2026 yilning yanvar–iyun oylarida Oʻzbekistondagi tijorat banklarining umumiy sof foydasi 10,99 trln soʻmni tashkil etdi. Taqqoslash uchun, 2025 yilning birinchi yarmida bu koʻrsatkich 6,51 trln soʻm boʻlgan.

Banklar olgan jami foydaning yarmidan koʻpi beshta bank hissasiga toʻgʻri keldi. Ipoteka-bank, Oʻzmilliybank, Oʻzsanoatqurilishbank, Hamkorbank va Kapitalbank birgalikda 5,51 trln soʻm sof foyda olgan. Bu bank tizimidagi umumiy natijaning 50,1 foiziga teng.

Eng katta sof foydani Ipoteka-bank qayd etdi — 1,39 trln soʻm. Bank oʻtgan yilning shu davridagi 392,5 mlrd soʻmlik zararni foydaga aylantirgan. Natijada uning moliyaviy natijasi bir yil ichida 1,78 trln soʻmga yaxshilandi.

Keyingi oʻrinlarni Oʻzmilliybank — 1,21 trln soʻm, Oʻzsanoatqurilishbank — 1,11 trln soʻm hamda Hamkorbank — 970 mlrd soʻm bilan egalladi. Kapitalbankning sof foydasi esa 38,4 foizga oshib, 833,6 mlrd soʻmga yetdi.

Xalq banki eng katta mutlaq oʻsishlardan birini koʻrsatdi. Bank foydasi 154,6 mlrd soʻmdan 650,5 mlrd soʻmga koʻtarilgan. Bir yillik oʻsish 495,9 mlrd soʻm yoki 320,8 foizni tashkil etdi.

Nisbiy hisobda Uzumbank yetakchi boʻldi. Uning sof foydasi 30,4 mlrd soʻmdan 258,1 mlrd soʻmga yetib, 8,5 baravar oshdi. TBC bankning foydasi 2,9 baravar koʻpayib, 288,1 mlrd soʻmni, InFinBankniki esa 2,6 baravar oshib, 353,2 mlrd soʻmni tashkil etdi.

Apexbank ham 2025 yilning birinchi yarmidagi 62,4 mlrd soʻmlik zarardan chiqib, 107,6 mlrd soʻm foyda oldi. Garant bankning 9,7 mlrd soʻmlik zarari esa 28,5 mlrd soʻmlik foydaga aylandi.

Shu bilan birga, toʻqqizta bankning moliyaviy natijasi yomonlashdi. Eng katta pasayish Biznesni rivojlantirish bankida kuzatildi. Bank sof foydasi 111,2 mlrd soʻm yoki 34,8 foizga kamayib, 208,5 mlrd soʻmni tashkil etdi.

Shuningdek, Orient Finans bankning sof foydasi 4,2 foizga kamayib, 501,6 mlrd soʻmni tashkil etdi. Anorbankda bu koʻrsatkich 22,5 foizga qisqarib, 79,2 mlrd soʻmga tushdi. Poytaxt bankning foydasi 46,2 foizga, Openbankniki esa 53,4 foizga kamaydi.

AVO bank yarim yillikni zarar bilan yakunlagan yagona faol bank boʻldi. Uning sof zarari oʻtgan yilgi 1,8 mlrd soʻmdan 7,1 mlrd soʻmgacha oshgan. Qolgan 33 ta bank 2026 yilning birinchi yarmida sof foyda qayd etdi.

Banklar sof foydasi haqidagi maʼlumotlar operativ hisobotlarga asoslanib, Bankers.uz nashri tomonidan eʼlon qilingan.

Rekord natijalar: Oʻzbekiston banklari birinchi yarim yillikda qancha sof foyda oldi?

Oʻzmilliybank 2025 yilda 1,9 trln soʻm sof foyda oldi