Yilning ikkinchi yarmida Markaziy bank asosiy stavkani 13 foizgacha pasaytirishi mumkin — YeTB

Yevroosiyo taraqqiyot bankining (YeTB) 2026 yil mart oyida eʼlon qilingan makroiqtisodiy sharhiga koʻra, Oʻzbekiston Markaziy banki yilning ikkinchi yarmida asosiy stavkani pasaytirishi ehtimoli yuqori.

Tashkilot inflyatsiyaning sekinlashuvi, milliy valyutaning mustahkamlanishi hamda iqtisodiy oʻsish surʼatlarini ushbu prognozning asosiy omillari sifatida keltirgan.

Asosiy stavka oʻzgarishsiz qolmoqda

Markaziy bank 2025 yil mart oyidan buyon asosiy stavkani 14 foiz darajasida saqlab kelmoqda. Jumladan, 2026 yil 18 mart kuni boʻlib oʻtgan Markaziy bank boshqaruvi yigʻilishida ham stavka oʻzgarishsiz qoldirildi. 

Biroq inflyatsiyaning 5 foizlik maqsadli koʻrsatkich tomon sekinlashib borayotgani fonida 2026 yilning ikkinchi yarmida stavkani taxminan 13 foizgacha pasaytirish uchun makroiqtisodiy sharoit shakllanishi mumkin.

Inflyatsiya sekinlashmoqda

Qattiq pul-kredit siyosati oʻz natijasini bermoqda. 2026 yil yanvar holatiga koʻra inflyatsiya 7,2 foizni tashkil etdi va bu soʻnggi toʻqqiz yildagi eng past koʻrsatkichlardan biri hisoblanadi. Mutaxassislar yil yakuniga qadar inflyatsiya darajasi 6,7 foizgacha pasayishini prognoz qilmoqda.

Milliy valyuta mustahkamlanmoqda

2025 yilda Oʻzbekiston soʻmi tarixda ilk bor AQSh dollariga nisbatan nominal qiymatda 6,8 foizga mustahkamlandi. Bunga oltin eksportidan tushgan rekord darajadagi daromadlar, pul oʻtkazmalari hajmining ortishi hamda toʻgʻridan-toʻgʻri xorijiy investitsiyalar oqimining koʻpayishi muhim omil boʻldi.

Iqtisodiy oʻsish yuqori surʼatlarda

2025 yilda Oʻzbekiston iqtisodiyoti 7,7 foizga oʻsdi. Ichki talabning oshishi, xususan chakana savdo, xizmat koʻrsatish va qurilish sohalaridagi faollik iqtisodiy oʻsishning asosiy drayverlari boʻldi. 2026 yilda esa YaIM oʻsishi biroz barqarorlashib, 6,7 foiz atrofida boʻlishi kutilmoqda.

YeTB tahliliga koʻra, inflyatsiyaning jilovlanishi va milliy valyutaning barqarorligi Markaziy bankka iqtisodiy faollikni qoʻllab-quvvatlash maqsadida foiz stavkalarini bosqichma-bosqich pasaytirish imkonini berishi mumkin.