Yanvar-fevral oylarida tashqi savdo aylanmasi $10,8 milliardga yetdi

Milliy statistika qoʻmitasi maʼlumotlariga koʻra, 2025 yil yanvar-fevral oylarida Oʻzbekistonning tashqi savdo aylanmasi 10,8 milliard AQSh dollariga yetdi. Bu koʻrsatkich 2024 yilning shu davriga nisbatan 973,3 million AQSh dollariga yoki 9,9% ga oshgan.

Eksport hajmi 4,6 milliard AQSh dollarni tashkil etib, oʻtgan yilga nisbatan 27,7% ga oʻsdi. Import esa 6,2 milliard AQSh dollariga yetib, 0,6% ga kamaydi. Natijada tashqi savdo balansida 1,55 milliard AQSh dollari miqdorida manfiy savdo qayd etildi.

Oʻzbekiston 162 ta davlat bilan savdo aloqalarini amalga oshirdi. Tashqi savdo aylanmasida eng katta ulush quyidagi davlatlarga toʻgʻri keldi:

• Xitoy – 19,2%
• Rossiya – 14,9%
• Qozogʻiston – 6,1%
• Turkiya – 3,9%
• Afgʻoniston – 2,5%

Eksport tarkibida oltinning ulushi sezilarli darajada oshdi. 2025 yil yanvar-fevral oylarida Oʻzbekiston 1,7 milliard AQSh dollari qiymatida oltin eksport qildi, bu esa umumiy eksportning 37,3% ini tashkil etdi. Mazkur sotuvlar oltin narxi yuqorilagan paytida amalga oshirilgan. 

Mavzuga doir: Xalqaro oltin-valyuta zaxiralari ilk marotaba $45 mlrdga yaqinlashdi

Bundan tashqari, sanoat mahsulotlari eksporti 12,4%, oziq-ovqat mahsulotlari va tirik hayvonlar 6,3%, kimyoviy mahsulotlar 5,9%, tayyor mahsulotlar esa 3,9% ulushga ega boʻldi. Xizmatlar eksporti 1,176 milliard AQSh dollariga yetib, umumiy eksportning 25,3% ini tashkil etdi.

Import hajmi 6,202 milliard AQSh dollariga teng boʻlib, uning asosiy qismini quyidagi tovarlar tashkil etdi:

• Mashina va transport vositalari – 36,8%
• Sanoat mahsulotlari – 16,5%
• Kimyoviy vositalar va farmatsevtika mahsulotlari – 12,2%

Eng koʻp import qilingan mahsulotlar qatorida don mahsulotlari, neft va neft mahsulotlari, avtomobillar hamda farmatsevtika vositalari yetakchilik qildi.