Shimoliy Koreya Bitcoin’lar miqdori boʻyicha dunyoda uchinchi oʻrinni egalladi — The Times
Bitcoin’larning asosiy manbai xakerlik hujumlari boʻlib, mamlakat hozirda faqatgina AQSh va Buyuk Britaniyadan ortda qolmoqda.
Shimoliy Koreya, xakerlarning kriptovalyutani oʻgʻirlashdagi muvaffaqiyatidan soʻng, AQSh va Britaniya hukumatlaridan keyingi uchinchi yirik Bitcoin egasiga aylandi. Bu haqda The Times nashri xabar berdi.
Kriptovalyutalar monitoringi kompaniyasi tomonidan eʼlon qilingan maʼlumotlarga koʻra, Shimoliy Koreyaning eng yirik va samarali kiber-xakerlik guruhi "Lazarus" oʻtgan oyda rekord darajadagi oʻgʻirlikni amalga oshirgandan soʻng, umumiy qiymati 886 million funt sterling boʻlgan 13 580 ta Bitcoin’ga egalik qilmoqda.
Bu Pxenyanni 3,9 milliard funt sterlinglik Bitcoin’ga yega Britaniya va kamida 12,7 milliard funt sterlinglik Bitcoin zaxirasi mavjud AQShdan keyingi oʻringga joylashtiradi.
Lazarus xakerlar guruhi, shuningdek, TraderTraitor nomi bilan ham tanilgan boʻlib, Kim Chen In rejimi va Shimoliy Koreyaning yadroviy qurol-yarogʻ dasturlarini moliyalashtiruvchi yetakchi kiberjinoyatchilik guruhi hisoblanadi. FBI ularning oʻtgan oy Bybit birjasidan £1.2 milliard Ethereum oʻgʻirlaganini tasdiqladi. Taqqoslash uchun, mazkur summa Shimoliy Koreyaning 2023 yildagi mudofaa byudjetidan (£1.1 milliard) ham oshib ketadi.
Lazarus xakerlari phishing (fishing) usulidan foydalangan holda Bybit foydalanuvchilarini aldab, tranzaksiya tasdiqlarini oʻzgartirish orqali ulkan mablagʻlarni qoʻlga kiritgan. Ushbu mablagʻlar keyinchalik "laering" usuli orqali markazlashmagan birjalar orqali yuvilgan, bu esa ularni kuzatishni qiyinlashtirgan.
Shimoliy Koreyaning kiberjinoyatlar orqali qoʻlga kiritgan mablagʻlari 2024 yilda global miqyosdagi kriptooʻgʻirliklarning 35 foizini (£1.7 milliard) tashkil etdi. BMT hisob-kitoblariga koʻra, Shimoliy Koreyaning yadroviy dasturining 40 foizi kiberjinoyatlar orqali moliyalashtirilmoqda.
