Oʻzbekistonda oltin quymalar narxi tarixiy rekordni yangiladi
17 sentabr kuni oltin quymasining bir gramm narxi 1,51 mln soʻmga yetib, yil boshidan buyon 30-marta rekord yangiladi. Soʻnggi 12 oyda oltin narxi 38 foizdan koʻproqqa oshgan.
Oʻzbekistonda oltin quymalari narxi 17 sentabr, chorshanba kuni yana tarixiy maksimumni yangiladi. Bu haqda Markaziy bank matbuot xizmati xabar berdi.
Ayni paytda bir gramm qimmatbaho metall narxi 1 510 660 soʻmni tashkil etmoqda. Ogʻirligi 5 gramm boʻlgan quymaning narxi 7,553 mln soʻmni tashkil etdi.
Joriy yil boshidan buyon oltin mahalliy bozorda 30-marta rekord narxni yangiladi. Sakkiz yarim oy davomida uning narxi 33,4 foizga, yillik kesimda esa 38,3 foizga (1 092 460 soʻmdan) oshgan
Jahon bozorida oltinning bir troya unsiyasi spot narxi $3 675 ni tashkil etmoqda. Bir gramm oltin esa $118.16 ni tashkil qilmoqda.
