Markaziy bank asosiy stavkani 14% ga oshirdi
Mazkur qaror inflyatsiya bosimi, talabning oʻsishi va inflyatsion kutilmalarning kuchayishi sababli qabul qilindi.
2025 yil 20 mart kuni Markaziy bank boshqaruvi asosiy stavkani 0,5 foiz bandga oshirib, 14% darajasida belgilashga qaror qildi. Bu qaror inflyatsiya bosimi, talabning oʻsishi va inflyatsion kutilmalarning kuchayishi sababli qabul qilindi.
2025 yil boshidan inflyatsiyada biroz oʻsish kuzatilib, fevral oyi yakunlariga koʻra 10,1% ni tashkil etdi. Bu asosan yoqilgʻi, kommunal xizmatlar, transport, taʼlim va tibbiy xizmatlar tariflari oshishi bilan bogʻliq. Narxlarning oʻsishi aholining inflyatsion kutilmalariga ham taʼsir qilib, ular 15,3% ga, tadbirkorlarniki esa 13,8% ga yetdi.
Soʻnggi oylarda yalpi talabning oʻsishi, jumladan, aholiga ajratilayotgan kreditlar va transchegaraviy pul oʻtkazmalari hajmining koʻpayishi xizmatlar inflyatsiyasini yuqori darajada ushlab turibdi. Shu bois, Markaziy bank pul-kredit siyosati qatʼiylik darajasini oshirishga qaror qildi.
Bu orqali inflyatsiyani jilovlash, iqtisodiyotdagi muvozanatni saqlash hamda oʻrta muddatli istiqbolda inflyatsiyani 5% maqsadli darajaga tushirish uchun yetarli sharoit yaratish koʻzda tutilgan.
Yil yakuniga qadar umumiy inflyatsiya 7-8% atrofida boʻlishi kutilmoqda. Agar kelgusi choraklarda inflyatsion bosim kutilganidan yuqori boʻlsa, Markaziy bank pul-kredit siyosati qatʼiylik darajasini yanada oshirish masalasini qayta koʻrib chiqishi mumkin.
Qaysi bank mahsulotlarida oʻzgarishlar boʻladi?
Kredit stavkalaridagi oʻzgarishlar:
- Uy-joy qurish va rekonstruksiya qilish kreditlari – 17,5% → 18%
- IQMK resurslaridan yangi uylar uchun ipoteka kreditlari – 19,5% → 20%
- Tadbirkorlikni rivojlantirish kompaniyasining asosiy stavkaga bogʻlangan kreditlari – 0,5 foizga oshiriladi
Foiz stavkasi oʻzgarmaydigan kreditlar:
- Imtiyozli taʼlim kreditlari – 13,5%
- Oilaviy tadbirkorlik uchun ayrim kreditlar – oʻzgarishsiz qoladi
Shuningdek, baʼzi omonatlar foizi asosiy stavkaga bogʻlangani sababli 0,5 foizga oshadi.
Mavzuga doir: Markaziy bank asosiy stavkasi nima va u qanday belgilanadi?
Maʼlumot uchun asosiy stavka boʻyicha navbatdagi yigʻilish 2025 yil 24 aprel kuni oʻtkazilishi rejalashtirilgan.
