Марказий банк асосий ставкани 14% га оширди

2025 йил 20 март куни Марказий банк бошқаруви асосий ставкани 0,5 фоиз бандга ошириб, 14% даражасида белгилашга қарор қилди. Бу қарор инфляция босими, талабнинг ўсиши ва инфляцион кутилмаларнинг кучайиши сабабли қабул қилинди.

2025 йил бошидан инфляцияда бироз ўсиш кузатилиб, февраль ойи якунларига кўра 10,1% ни ташкил этди. Бу асосан ёқилғи, коммунал хизматлар, транспорт, таълим ва тиббий хизматлар тарифлари ошиши билан боғлиқ. Нархларнинг ўсиши аҳолининг инфляцион кутилмаларига ҳам таъсир қилиб, улар 15,3% га, тадбиркорларники эса 13,8% га етди.

Сўнгги ойларда ялпи талабнинг ўсиши, жумладан, аҳолига ажратилаётган кредитлар ва трансчегаравий пул ўтказмалари ҳажмининг кўпайиши хизматлар инфляциясини юқори даражада ушлаб турибди. Шу боис, Марказий банк пул-кредит сиёсати қатъийлик даражасини оширишга қарор қилди.

Бу орқали инфляцияни жиловлаш, иқтисодиётдаги мувозанатни сақлаш ҳамда ўрта муддатли истиқболда инфляцияни 5% мақсадли даражага тушириш учун етарли шароит яратиш кўзда тутилган.

Йил якунига қадар умумий инфляция 7-8% атрофида бўлиши кутилмоқда. Агар келгуси чоракларда инфляцион босим кутилганидан юқори бўлса, Марказий банк пул-кредит сиёсати қатъийлик даражасини янада ошириш масаласини қайта кўриб чиқиши мумкин.

Қайси банк маҳсулотларида ўзгаришлар бўлади?

Кредит ставкаларидаги ўзгаришлар:

• Уй-жой қуриш ва реконструкция қилиш кредитлари – 17,5% → 18%
• ИҚМК ресурсларидан янги уйлар учун ипотека кредитлари – 19,5% → 20%
• Тадбиркорликни ривожлантириш компаниясининг асосий ставкага боғланган кредитлари – 0,5 фоизга оширилади

Фоиз ставкаси ўзгармайдиган кредитлар:

• Имтиёзли таълим кредитлари – 13,5%
• Оилавий тадбиркорлик учун айрим кредитлар – ўзгаришсиз қолади

Шунингдек, баъзи омонатлар фоизи асосий ставкага боғлангани сабабли 0,5 фоизга ошади.

Мавзуга доир: Марказий банк асосий ставкаси нима ва у қандай белгиланади?

Маълумот учун асосий ставка бўйича навбатдаги йиғилиш 2025 йил 24 апрель куни ўтказилиши режалаштирилган.