Iyul oyida Oʻzbekiston oltin zaxiralari rekord darajaga yetdi
Iyul oyida Oʻzbekiston Markaziy banki zaxiralaridagi oltin qiymati 265 mln dollarga koʻpayib, $38,68 mlrdga yetdi va tarixiy rekordni yangiladi.
Bundan tashqari, Markaziy bank xarid qilgan qimmatli qogʻozlar qiymati 300 mln dollardan ortiqqa yoki 42,7 foizga oshib, ilk bor $1 mlrdga yetdi.
Iyul oyida Oʻzbekistonning oltin-valyuta zaxiralari biroz oshib, $48,74 mlrdga yetdi. Bu haqda Markaziy bank hisobotida maʼlum qilindi.
Mazkur koʻrsatkich oʻtgan oyga nisbatan $193,7 mlnga yuqori.
Oy davomida Markaziy bank zaxiralaridagi oltin qiymati $265 mlnga oshib, $38,68 mlrdga yetdi va navbatdagi rekord darajani yangiladi. Bu oʻsish oltin narxining koʻtarilishi hisobiga yuz berdi, chunki zaxiradagi oltin hajmi oʻzgarmadi — 11,7 mln troya unsiya.
| Koʻrsatkichlar | 1 yanvar 2025 | 1 iyul 2025 | 1 avgust 2025 |
| Rasmiy zaxira aktivlari (mlrd $) | 41,2 | 48,55 | 48,74 |
| Oltin (mlrd $) | 32,03 | 38,42 | 38,68 |
| Sof hajmi (mln troya unsiya) | 12,3 | 11,7 | 11,7 |
| Xorijiy valyutadagi zaxira aktivlari (mlrd $) | 8,6 | 9,56 | 9,5 |
| Shu jumladan immatli qogʻozlar | $101,7 mln | $708,8 mln | $1,01 mlrd |
Shu bilan birga, mamlakatning valyuta zaxiralari $63,3 mlnga kamaydi. Avgust boshida ularning hajmi $9,5 mlrddan pastga tushdi. Ushbu mablagʻ tarkibiga boshqa davlatlar markaziy banklaridagi va Xalqaro valyuta jamgʻarmasidagi $1,05 mlrd hamda xorijdagi tijorat banklaridagi $7,42 mlrd kiradi.
Bundan tashqari, Markaziy bank xarid qilgan qimmatli qogʻozlar qiymati 300 mln dollardan ortiq yoki 42,7 foizga oshib, ilk bor $1 mlrdga yetdi.
Avvalroq Pinkod Oʻzbekiston iyun oyida jahon miqyosida oltin xarid qilish boʻyicha yetakchilik qilgani haqida xabar bergandi. Jahon oltin kengashi (World Gold Council) maʼlumotlariga koʻra, mamlakat Markaziy banki bir oy ichida 9 tonna oltin xarid qilib, Markaziy banklar orasida birinchi oʻrinni egallagan.
