Ilon Mask kompaniyalarining bozor qiymati AQSh saylovlaridan beri $613 milliard dollarga yuqoriladi — Bloomberg

AQShdagi soʻnggi saylovdan keyin Ilon Maskga tegishli kompaniyalar katta iqtisodiy oʻsishga erishmoqda. Bloomberg hisobotiga koʻra, saylovdan soʻng: Tesla aksiyalari rekord darajaga koʻtarildi, SpaceX dunyodagi eng qimmat texnologik startapga aylandi, xAI sunʼiy intellekt bozorida oʻz bahosini deyarli ikki baravar oshirdi va yana yangi investitsiyalarni jalb qilishni rejalashtirmoqda.

Investorlar Mask bilan yaqin aloqada boʻlishni xohlamoqda. U Donald Trampning saylov kampaniyasiga katta miqdorda moliyaviy koʻmak ajratgan va hozirda AQSh maʼmuriyatining yangi iqtisodiy islohotlarida faol ishtirok etmoqda. Saylovdan beri Mask kompaniyalarining bozor qiymati $613 milliardga oshgan.

Mask kompaniyalari ichida eng katta oʻsishga erishgani Tesla boʻldi. Saylovdan keyingi olti hafta ichida avtomobil ishlab chiqaruvchisining aksiyalari qariyb ikki baravarga koʻtarilib, tarixdagi eng yuqori koʻrsatkichga yetdi. Bu esa Maskning shaxsiy boyligini 17 dekabr kuni Bloomberg tomonidan qayd etilgan eng yuqori miqdor – $486,4 milliardga yetkazdi. Oʻshandan beri Tesla aksiyalari 25 foizga tushgan boʻlsa-da, kompaniyaning qiymati hali ham taxminan $1,17 trillionni tashkil etmoqda.

SpaceX va uning investorlari dekabr oyida kompaniyaning Insider aksiyalarini sotib olish boʻyicha kelishuvga erishdi. Ushbu bitim SpaceX’ning qiymatini 350 milliard dollarga yetkazdi — bu esa olti oy oldingi narxdan 67 foizga koʻpdir. Yangi baholash SpaceX’ni dunyoning eng qimmat texnologik startapiga aylantirdi.

Maskning sunʼiy intellekt startapi hisoblangan xAI yaqinda oʻzining yangi Grok-3 chat-botini ishga tushirdi. Bundan tashqari, kompaniya Dell bilan 5 milliard dollarlik server quvvatini sotib olish boʻyicha muzokaralar olib bormoqda. Saylovdan keyin xAI oʻzining qiymatini 40 milliard dollardan oshirib, sarmoya jalb qildi va hozir yana shu qiymatni deyarli ikki baravar oshirish uchun sarmoyadorlarni izlamoqda.

Mavzuga doir: “Grok-3 yer yuzidagi eng aqlli sunʼiy intellekt” — Ilon Mask

Ilon Maskning kompaniyalari orasida eng ajablanarlisi X (sobiq Twitter) boʻldi. Mask 2022 yilda Twitter’ni 44 milliard dollarga sotib olganida, bu bitim qattiq tanqid qilingan edi, chunki reklamachilar platformani tark etdi va servisda uzilishlar kuzatildi. Fidelity Investments oktabr oyiga kelib X’ning qiymatini 72% kamaytirib baholagan edi. Biroq, X oʻzining qiymatini 44 milliard dollar atrofida baholagan holda yangi investorlarni jalb qilishga muvaffaq boʻlsa, kompaniyaning kelajagi ancha mustahkamlanadi. Shuningdek, bu Maskning boyligini 20 milliard dollarga oshirib, uni dunyoning eng boy odami sifatidagi oʻrnini yanada mustahkamlaydi.

Maʼlumot uchun, hozirda Maskning boyligi Bloomber milliarderlar indeksiga koʻra, $397 mlrdga baholanmoqda.