Илон Маск компанияларининг бозор қиймати АҚШ сайловларидан бери $613 миллиард долларга юқорилади — Bloomberg
Tesla, SpaceX, xAI ва X компаниялари Маскнинг таъсиридан фойдаланиб, рекорд даражадаги молиявий натижаларга эришмоқда.
АҚШдаги сўнгги сайловдан кейин Илон Маскга тегишли компаниялар катта иқтисодий ўсишга эришмоқда. Bloomberg ҳисоботига кўра, сайловдан сўнг: Tesla акциялари рекорд даражага кўтарилди, SpaceX дунёдаги энг қиммат технологик стартапга айланди, xAI сунъий интеллект бозорида ўз баҳосини деярли икки баравар оширди ва яна янги инвестицияларни жалб қилишни режалаштирмоқда.
Инвесторлар Маск билан яқин алоқада бўлишни хоҳламоқда. У Доналд Трампнинг сайлов кампаниясига катта миқдорда молиявий кўмак ажратган ва ҳозирда АҚШ маъмуриятининг янги иқтисодий ислоҳотларида фаол иштирок этмоқда. Сайловдан бери Маск компанияларининг бозор қиймати $613 миллиардга ошган.
Маск компаниялари ичида энг катта ўсишга эришгани Tesla бўлди. Сайловдан кейинги олти ҳафта ичида автомобиль ишлаб чиқарувчисининг акциялари қарийб икки бараварга кўтарилиб, тарихдаги энг юқори кўрсаткичга етди. Бу эса Маскнинг шахсий бойлигини 17 декабрь куни Bloomberg томонидан қайд этилган энг юқори миқдор – $486,4 миллиардга етказди. Ўшандан бери Tesla акциялари 25 фоизга тушган бўлса-да, компаниянинг қиймати ҳали ҳам тахминан $1,17 триллионни ташкил этмоқда.
SpaceX ва унинг инвесторлари декабрь ойида компаниянинг Insider акцияларини сотиб олиш бўйича келишувга эришди. Ушбу битим SpaceX’нинг қийматини 350 миллиард долларга етказди — бу эса олти ой олдинги нархдан 67 фоизга кўпдир. Янги баҳолаш SpaceX’ни дунёнинг энг қиммат технологик стартапига айлантирди.
Маскнинг сунъий интеллект стартапи ҳисобланган xAI яқинда ўзининг янги Grok-3 чат-ботини ишга туширди. Бундан ташқари, компания Dell билан 5 миллиард долларлик сервер қувватини сотиб олиш бўйича музокаралар олиб бормоқда. Сайловдан кейин xAI ўзининг қийматини 40 миллиард доллардан ошириб, сармоя жалб қилди ва ҳозир яна шу қийматни деярли икки баравар ошириш учун сармоядорларни изламоқда.
Мавзуга доир: “Grok-3 ер юзидаги энг ақлли сунъий интеллект” — Илон Маск
Илон Маскнинг компаниялари орасида энг ажабланарлиси Х (собиқ Twitter) бўлди. Маск 2022 йилда Twitter’ни 44 миллиард долларга сотиб олганида, бу битим қаттиқ танқид қилинган эди, чунки рекламачилар платформани тарк этди ва сервисда узилишлар кузатилди. Fidelity Investments октабр ойига келиб Х’нинг қийматини 72% камайтириб баҳолаган эди. Бироқ, Х ўзининг қийматини 44 миллиард доллар атрофида баҳолаган ҳолда янги инвесторларни жалб қилишга муваффақ бўлса, компаниянинг келажаги анча мустаҳкамланади. Шунингдек, бу Маскнинг бойлигини 20 миллиард долларга ошириб, уни дунёнинг энг бой одами сифатидаги ўрнини янада мустаҳкамлайди.
Маълумот учун, ҳозирда Маскнинг бойлиги Bloomber миллиардерлар индексига кўра, $397 млрдга баҳоланмоқда.
