Bitcoin narxi ilk marotaba $110 000 dan oshdi
22 may kungi savdo vaqtida raqamli aktiv narxi $111 875 gacha koʻtarilgan.
22 may kungi savdolarda Bitcoin narxi keskin oshib, tarixda ilk bor $112 000 chegarasiga yaqinlashdi. Bu kriptovalyutaning yanvar oyida qayd etilgan $109 000 darajasidagi avvalgi rekordidan ham yuqoridir.
CoinDesk Bitcoin narxlari indeksiga koʻra, savdo vaqtida raqamli aktiv $111 875 gacha koʻtarilgan. Xabar tayyorlanayotgan paytda esa narx $110 871 atrofida saqlanib turibdi.
Bitcoin’ning rekord darajaga koʻtarilishi global iqtisodiy sharoitlarning qulaylashuvi bilan izohlanmoqda. Xususan, AQSh va Xitoy oʻrtasidagi savdo urushining yumshashi, shuningdek Yevropa va Osiyoda foiz stavkalarining pasaytirilishi xavfli aktivlarga, jumladan kriptovalyutalarga boʻlgan talabni kuchaytirmoqda.
Bitcoin ortidan boshqa yirik kriptovalyutalar ham yuqorilab ketdi. Ethereum, Solana, Dogecoin va Cardano narxlari ham soʻnggi kunlarda sezilarli darajada oʻsgan.
Eslatib oʻtamiz, Pinkod 4 yanvar kuni eʼlon qilingan maqolada tahlilchilar 2025 yilda Bitcoin narxi $150 000–$200 000 oraligʻigacha yetishini taxmin qilayotganini bildirgan edi.
