AQShda kongressmen Donald Tramp tasvirlangan $250lik kupyura ishlab chiqishni taklif qildi
Avvalroq, boshqa bir respublikachi Trampning yuzini Maunt-Rushmor qoyalariga joylashtirish taklifini ham ilgari surgandi.
AQSh Kongressining respublikachi aʼzosi Jo Uilson Donald Trampning suratini aks ettiruvchi yangi $250 kupyura chiqarish taklifini ilgari surdi. Bu haqda u oʻzining X (sobiq Twitter) sahifasida eʼlon qilib, ushbu tashabbusni “Donald J. Trump $250 Bill Act” deb atadi.
“Donald J. Trump $250 Bill Act” loyihasini taqdim etishdan faxrlanaman. Bu katta va goʻzal kupyura Amerika Qoʻshma Shtatlarining 250 yilligini va eng qadrli prezidentimiz Donald J. Trampni sharaflaydi”,– deb yozdi Uilson.
Qonunchilik bunga yoʻl qoʻyadimi?
Hozirgi AQSh qonunlariga koʻra, faqat vafot etgan shaxslarning suratlari valyutada tasvirlanishi mumkin. AQSh kodeksi, 31-bob (“Pul va moliya”), 5114-modda ushbu qoidani qatʼiy belgilaydi:
“AQSh valyutasi va qimmatli qogʻozlarida faqat vafot etgan shaxsning surati tasvirlanishi mumkin”.
Shuningdek, AQSh zarbxonasi (U.S. Mint) tangalar uchun ham shunga oʻxshash siyosat yuritadi. Demak, hozirgi qonunchilik sharoitida Tramp tirik ekan, uning suratini rasmiy valyutada aks ettirish imkonsiz.
Bundan tashqari, boshqa bir respublikachi qonunchi – Anna Paulina Luna Donald Trampning yuzini Maunt-Rushmor yodgorligi toshlariga joylashtirish taklifini ham ilgari surgan.
Maʼlumot uchun, Maunt-Rushmor togʻida AQShning toʻrt prezidenti – Jorj Vashington, Tomas Jefferson, Teodor Ruzvelt va Avraam Linkolnlarning yuzlari tasvirlangan.
Mavzuga doir: AQShda “Tramp oltin kartasi” joriy etiladi.
