АҚШда конгрессмен Доналд Трамп тасвирланган $250лик купюра ишлаб чиқишни таклиф қилди
Аввалроқ, бошқа бир республикачи Трампнинг юзини Маунт-Рушмор қояларига жойлаштириш таклифини ҳам илгари сурганди.
АҚШ Конгрессининг республикачи аъзоси Жо Уилсон Доналд Трампнинг суратини акс эттирувчи янги $250 купюра чиқариш таклифини илгари сурди. Бу ҳақда у ўзининг X (собиқ Twitter) саҳифасида эълон қилиб, ушбу ташаббусни “Donald J. Trump $250 Bill Act” деб атади.
“Donald J. Trump $250 Bill Act” лойиҳасини тақдим этишдан фахрланаман. Бу катта ва гўзал купюра Америка Қўшма Штатларининг 250 йиллигини ва энг қадрли президентимиз Доналд Ж. Трампни шарафлайди”,– деб ёзди Уилсон.
Қонунчилик бунга йўл қўядими?
Ҳозирги АҚШ қонунларига кўра, фақат вафот этган шахсларнинг суратлари валютада тасвирланиши мумкин. АҚШ кодекси, 31-боб (“Пул ва молия”), 5114-модда ушбу қоидани қатъий белгилайди:
“АҚШ валютаси ва қимматли қоғозларида фақат вафот этган шахснинг сурати тасвирланиши мумкин”.
Шунингдек, АҚШ зарбхонаси (U.S. Mint) тангалар учун ҳам шунга ўхшаш сиёсат юритади. Демак, ҳозирги қонунчилик шароитида Трамп тирик экан, унинг суратини расмий валютада акс эттириш имконсиз.
Бундан ташқари, бошқа бир республикачи қонунчи – Анна Паулина Луна Доналд Трампнинг юзини Маунт-Рушмор ёдгорлиги тошларига жойлаштириш таклифини ҳам илгари сурган.
Маълумот учун, Маунт-Рушмор тоғида АҚШнинг тўрт президенти – Жорж Вашингтон, Томас Жефферсон, Теодор Рузвелт ва Авраам Линколнларнинг юзлари тасвирланган.
Мавзуга доир: АҚШда “Трамп олтин картаси” жорий этилади.
