Anor Bank reklama qonunchiligini buzgani uchun jarimaga tortildi
Raqobat qoʻmitasi Anor Bank’ning Instagram’dagi aksiya reklamasida aksiya shartlari, limit va limitdan oshganda qoʻllaniladigan komissiya haqida toʻliq maʼlumot berilmaganini aniqladi. Bankka nisbatan moliyaviy jarima qoʻllanildi, shuningdek, qonunbuzilishni bartaraf etish boʻyicha majburiy koʻrsatma berildi.
Raqobat qoʻmitasi Anor Bank’ning Instagram’dagi aksiya reklamasida muhim shartlar toʻliq koʻrsatilmaganini aniqladi. Bankka nisbatan moliyaviy jarima qoʻllanildi, biroq jarima miqdori ochiqlanmagan.
Qoʻmita maʼlumotlariga koʻra, tekshiruv Toshkent viloyatida istiqomat qiluvchi fuqaroning murojaati asosida oʻtkazilgan. Unda bank tomonidan aksiya doirasida eʼlon qilingan reklama axborotida aksiya shartlari toʻliq koʻrsatilmagani yuzasidan eʼtiroz bildirilgan.
Oʻrganish davomida reklamada moliyaviy xizmatlar boʻyicha shartnomaning muhim shartlaridan biri hisoblangan aksiyaning amal qilish shartlari, unga qoʻllanilgan limit hamda limitdan oshgan hollarda komissiya toʻgʻrisidagi maʼlumotlar berilmagani aniqlangan.
Mazkur holatlar yuzasidan Raqobat qoʻmitasining Maxsus komissiyasi tomonidan “Reklama toʻgʻrisida”gi qonunning 16, 21 va 43-moddalari talablari buzilishi alomatlari boʻyicha Anor Bank’ga nisbatan ish qoʻzgʻatilgan.
Ishni koʻrib chiqish yakunlariga koʻra, bankka nisbatan moliyaviy jarima qoʻllanilgan. Shuningdek, qonunbuzilish holatini bartaraf etish va kelgusida bunday holatlarga yoʻl qoʻymaslik boʻyicha bajarilishi majburiy boʻlgan koʻrsatma berilgan.
