Apex bank 2025 йилнинг биринчи чорагига доир молиявий ҳисоботини эълон қилди. Ҳисоботга кўра, банк ушбу чоракни 26,7 миллиард сўм зарар билан якунлади. Маълумот учун, молиявий ҳисоботларини эълон қилган банклар орасида ҳозирча Apex bank зарар қайд этган ягона банк ҳисобланади.

Банкнинг жами активлари 1,3 триллион сўмни ташкил қилмоқда. Фоизли даромадлар 16,8 миллиард сўмга етган бўлса-да, кредит ва лизинг фаолиятидан келиб чиқадиган эҳтимолий зарарлар ҳисобга олингач, бу йўналиш бўйича 6,5 миллиард сўмлик соф зарар қайд этилган.

Шу билан бирга, банкнинг фоизсиз даромадлари 15 миллиард сўмни ташкил қилган. Барча харажатлар ҳисобга олинганда, умумий молиявий натижа салбий бўлиб, Apex bank чоракни 26,7 миллиард сўмлик соф зарар билан якунлаган.

Таъкидлаш жоизки, банк 2024 йилнинг биринчи чорагини 2,9 миллиард сўм зарар билан якунлаган эди. Бу эса бир йил ичида зарар миқдори 823,4 фоизга ошганини кўрсатади.

Apex bank биринчи чорак якуни бўйича қарийб 27 млрд сўм зарар қайд этди