Хитойнинг TikTok ижтимоий тармоғи ота-она назорати ва вояга етмаганлар хавфсизлигига қаратилган бир қатор муҳим ўзгаришларни ўз ичига олган катта янгиланишни тақдим қилди.

Энди ота-оналар фарзандларининг обуначилари ва кузатувчиларини кўриш, шунингдек, фарзандлари платформада кимларни блоклангани ҳақида маълумот олиш имкониятига эга бўлади.

Янги “Time Away” функцияси ёрдамида ота-оналар фарзандлари учун TikTok ишламайдиган аниқ вақтларни, масалан, мактаб соатлари ёки кечки пайтларда белгилаши мумкин, бу эса экранга сарфланадиган вақтни бошқаришда ёрдам беради.

Келгуси ойларда TikTok ота-оналарга фарзандлари қайси видеолар ҳақида шикоят қилгани тўғрисида хабар беради, бу эса фарзандларининг платформадаги фаолияти ҳақида янада яхшироқ тасаввур ҳосил қилиш имконини беради.

TikTok энди 16 ёшдан кичик фойдаланувчиларга кечқурун иловани ёпишни таклиф қилади. Агар бола соат 22:00 дан кейин TikTok’ни очишга ҳаракат қилса, илова ёқимли мусиқа чалиб, дам олишни эслатади ва соғлом турмуш тарзига ундайди.

TikTok, шунингдек, технология компаниялари фойдаланувчиларнинг ёшини текшириш бўйича кучайтирилган назоратга дучор бўлаётган бир пайтда, ёш кафолати масаласига эътибор қаратди. Компания 13 ёшдан кичик болаларнинг рўйхатдан ўтишини олдини олиш ва ўсмирларнинг ёшига мос тажрибага эга бўлишини таъминлаш учун сунъий интеллектдан фойдаланишини маълум қилди.

Маълумот учун, TikTok ҳозирда Ўзбекистон ҳудудида блокланган. Шунга қарамасдан компания 2024 йилда хизмат кўрсатиш соҳасидаги энг кўп солиқ тўлаган топ-10 хорижий компания рўйхатига кирган эди.

TikTok’да кучайтирилган ота-она назорати функцияси ишга туширилди