Meta, Google ва TikTok ижтимоий тармоқларга қарамлик бўйича 3 мингдан ортиқ даъвога жавоб беради
АҚШ апелляция суди Meta, Google, TikTok ва Snapchat’га қарши 3 мингдан ортиқ даъвони кўриб чиқишни давом эттиришга рухсат берди. Компаниялар ўз платформаларини болалар ва ўсмирларни ҳаддан ташқари кўп фойдаланишга ундайдиган тарзда яратганликда айбланмоқда.
Суд Meta ва TikTok’нинг қуйи инстанция қарорини бекор қилиш ҳақидаги шикоятини рад этди. Бу ҳақда Reuters хабар берди.
Даъволар АҚШ штатлари, мактаблар, маҳаллий ҳокимликлар ва алоҳида фуқаролар томонидан киритилган. Уларнинг таъкидлашича, ижтимоий тармоқларнинг айрим функциялари ёшларни платформада узоқроқ ушлаб туришга мўлжалланган.
Даъвогарларга кўра, бундай механизмлар болалар ва ўсмирлар орасида хавотир, тушкунлик, ўз танасидан норозилик ва бошқа руҳий саломатлик муаммоларини кучайтирган.
Федерал судларга киритилган 3 мингдан ортиқ иш Калифорниянинг Окленд шаҳридаги судда бирлаштирилган. Даъвогарлар компаниялардан етказилган зарарни қоплаш, жарималар тўлаш ва олинган даромаднинг бир қисмини қайтаришни талаб қилмоқда.
Шу билан бирга, штатлар судларида ҳам юзлаб шунга ўхшаш даъволар мавжуд. Калифорния штати судининг ўзида қарийб 3,3 мингта иш битта жараёнга бирлаштирилган.
Апелляция суди Meta’нинг 29 штат бош прокурори қўллаб-қувватлаган бошқа суд ишини кечиктириш ҳақидаги талабини ҳам рад этди.
Ушбу ишда Meta болаларнинг шахсий маълумотларини ноқонуний йиғиш ва улардан фойдаланиш, ёшларни ижтимоий тармоқларда узоқроқ ушлаб турадиган механизмларни яратиш ҳамда платформалар хавфсизлиги ҳақида фойдаланувчиларни чалғитишда айбланмоқда.
Таққослаш учун, 2026 йил мартида Лос-Анжелес суди Meta ва Google’ни ёш фойдаланувчиларга зарар етказадиган платформаларни яратишда эҳтиётсизлик қилган деб топган эди. Instagram ва YouTube’дан болалигидан фойдаланиб, кейинчалик руҳий саломатлик муаммоларига дуч келганини айтган ёш аёлга 6 млн доллар товон белгиланган.
Нью-Мексико суди эса Meta фаолиятини жамоатчиликка зарар етказувчи ҳолат деб баҳолади. Компанияга ўсмирларнинг руҳий саломатлигини қўллаб-қувватлаш жамғармасига 567 млн доллар тўлаш ва ёш фойдаланувчилар учун қўшимча хавфсизлик чораларини жорий этиш мажбурияти юкланди.
Ушбу ишнинг олдинги босқичида Meta платформалар хавфсизлиги ҳақида истеъмолчиларни чалғитган деб топилиб, компанияга яна 375 млн доллар тўлаш мажбурияти юкланган эди.
Meta ва Google ўзларига қўйилган айбловларни рад этмоқда ҳамда суд қарорлари устидан шикоят қилишини билдирган.
Апелляция судининг янги қарори компаниялар айбдор деб топилганини англатмайди. Қарор уларга қарши киритилган минглаб даъволарни судда кўриб чиқишни давом эттиришга имкон беради.
