Яна иккита олтин кони яқинда ташкил қилинган хитой компаниясига сотилгани маълум бўлди
Навоий вилоятидаги “Корумди” ва “Жонкелди” олтин конлари бўйича ўтказилган аукционларда икки ҳафта аввал рўйхатдан ўтган “Xinyuan Mining” компанияси ғолиб бўлди.
Аввалроқ, ташкил этилганига 20 кун ҳам тўлмаган бошқа бир хитой компанияси Навоий ва Бухоро вилоятларидаги икки олтин конидан фойдаланиш ҳуқуқини қўлга киритгани хабар қилинганди.
22 январь куни E-auksion платформасида Навоий вилоятининг Нурота туманидаги “Корумди” участкасидан фойдаланиш ҳуқуқи савдога қўйилди.
Бошланғич нархи 4,12 млрд сўм этиб белгиланган лот учун савдо 5 соат 41 дақиқа давом этди. Якунда “Xinyuan Mining” компанияси 25,5 млрд сўмлик таклиф билан ғолиб чиқди. Бу бошланғич нархдан қарийб 6,2 баравар юқори кўрсаткичдир.
“Корумди” участкаси Нурота туманидан 23 км шимолий-шарқда жойлашган бўлиб, 127 гектар майдонга эга. Геологик баҳолашларга кўра, бу ҳудудда 1,7 тонна олтин ва 3,6 тонна кумуш захиралари мавжуд.
“Xinyuan Mining” бундан бир кун аввал яна бир олтин кони бўйича аукционда ҳам ғолиб бўлган. 21 август куни “Жонкелди” участкаси бўйича савдо бўлиб ўтган. Бошланғич нархи 4,12 млрд сўм бўлган лотни компания 12,2 млрд сўмлик таклиф билан ютиб олган.
Мазкур объект Навоий вилояти, Нурота туманидан, Конимех шаҳарчасидан 22,5 км шимолий-шарқда жойлашган бўлиб, 90 гектар майдонда 4 тонна олтин ва 13,9 тонна кумуш борлиги баҳоланган.
Қизиқарли томони, ушбу иккита объектни ютиб олган “Xinyuan Mining” 8 август куни, яъни савдодан икки ҳафта аввал рўйхатдан ўтган. Бу аввалроқ Навоий ва Бухоро вилоятларидаги иккита олтин конидан фойдаланиш ҳуқуқини ютиб олган “Zhongcheng Mining” компанияси рўйхатдан ўтган кун билан бир хилдир.
Очиқ маълумотларга кўра, “Xinyuan Mining” акциядорлари сифатида учта хорижлик жисмоний шахс — Хиао Наиха (55%), Чен Чен (25%) ва Ву Сиқи (20%) қайд этилган.
Аввалроқ Pinkod Ўзбекистонда қисқа муддат ичида тўртта олтин конидан фойдаланиш ҳуқуқи сотилгани ҳақида ёзган эди.
Шунингдек, нашр ўрганишларига кўра, август ойида хитойлик инвесторларга алоқадор бўлиши мумкин бўлган корхоналар камида бешта олтин кони бўйича аукционда ютиб чиққан.
