UzAuto Motors АЖ уч ойда рекорд даражада — қарийб 2,8 трлн сўм соф фойда олди

UzAuto Motors АЖ 2025 йил май ойида ўтган йилнинг учинчи чорагига оид молиявий ҳисоботини эълон қилди. 

Ушбу давр якунларига кўра, компания қарийб 2,8 триллион сўм (тахминан 213 миллион доллар) миқдорида соф фойда кўрган. Бу кўрсаткич UzAuto Motors тарихида, молиявий ҳисоботларни оммага эълон қила бошлаганидан буён, рекорд даража ҳисобланади. Қолаверса, бу натижа 2015, 2016, 2017, 2018 ва 2019 йиллардаги йиллик соф фойда миқдоридан ҳам юқори.

Таққослаш учун, айни чоракда Ўзбекистондаги бирор бир банк UzAuto Motors каби даромад кўрмаган.

Компаниянинг балансдаги жами активлари ҳозирда 31 триллион сўмни ташкил этмоқда. Бу рақам ҳисобот даври бошидан бери 5 трлн сўмдан ортиққа камайган. 

Компания ўтган йил июль-сентябрь ойларида маҳсулотлар сотишдан жами 40,6 трлн сўм даромад кўрган бўлиб, шундан 7,1 трлн сўмлик қисми соф ялпи фойда ҳисобига тўғри келади. 

Шунингдек, компания ушбу даврда 713,5 миллиард сўм миқдорида фойда солиғи тўлаган. Бу ўтган йилнинг шу даврига нисбатан икки баравар кўп дегани.

Умуман олганда, барча харажатлар чегириб ташланганда UzAuto Motors 2 трлн 754 млрд сўм соф фойда олди. 

Эслатиб ўтиш керак, 2025 йил 1 майдан бошлаб, янги электромобиллар учун утилизация йиғими тўрт бараварга оширилди.

Ҳукумат қарорига кўра, ишлаб чиқарилганига уч йилгача бўлган электромобиллар учун йиғим базавий ҳисоблаш миқдорининг 120 баравари этиб белгиланган (аввал 30 баравар). Ишлаб чиқарилганига уч йилдан ортиқ бўлган электромобиллар учун эса бу кўрсаткич БҲМнинг 210 бараварига етказилади (аввалги 90 бараварга нисбатан).

Мазкур тартиб кучга кириши натижасида, йил бошидан бери кескин камайган автомобиль импорти янада қисқариши мумкин.