Ўзбекистон олти ойлик танаффусдан сўнг олтин экспортини қайта тиклади
Апрель ойида Ўзбекистон 2025 йил сентабридан бери илк бор олтин экспортини амалга оширди. Ҳисобот ойида ташқи бозорларга чиқарилган олтин ҳажми қарийб $1,5 млрдни ташкил этди.
Ўзбекистон 2026 йил апрель ойида олти ойлик танаффусдан сўнг олтин экспортини қайта тиклади.
Миллий статистика қўмитаси маълумотларига кўра, январь–апрель ойларида номонетар олтин экспорти $1,5 млрдни ташкил этди. Бу жами экспортнинг 15,1 фоизига тенг.
Охирги марта олтин экспорти 2025 йил сентабр ойида амалга оширилган бўлиб, ўшанда ҳам ҳажм қарийб $1,5 млрдни ташкил этган эди.
Январь–апрель ойларида мамлакатнинг умумий экспорти $9,97 млрдни ташкил этди. Бу ўтган йилнинг мос даврига нисбатан 16,8 фоизга кам. Экспортдаги пасайишда олтин экспорти ҳажмининг ўтган йилга нисбатан анча паст шакллангани муҳим омиллардан бири бўлди. 2025 йил январь–апрель ойларида номонетар олтин экспорти $5,48 млрд бўлган бўлса, жорий йилнинг мос даврида бу кўрсаткич $1,5 млрдга тенг бўлди.
Шу билан бирга, олтинсиз экспорт динамикасида ижобий ўсиш сақланиб қолди. Ҳисобот даврида олтинсиз товарлар экспорти $5 млрддан ошиб, ўтган йилнинг мос даврига нисбатан 28,7 фоизга кўпайди. Бу олтин экспорти қисқарган шароитда бошқа экспорт йўналишлари фаоллашганини кўрсатади.
Шу билан бирга, апрель ойида Марказий банкнинг халқаро захиралари таркибидаги олтин қиймати $743,6 млнга ошиб, $61,6 млрдга етди. Бунда олтин захираларининг жисмоний ҳажми 13,4 млн троя унциясидан 13,3 млн троя унциясигача қисқарган.
