Нега Қозоғистоннинг Magnum компанияси Ўзбекистондаги супермаркетлар тармоғини қисқартирмоқда?
Ўзбекистон бозорида жадал кенгайишни мақсад қилган Қозоғистоннинг Magnum супермаркетлар тармоғи 2024 йилнинг ўзида Ўзбекистондаги дўконлари сонини 17 тага етказмоқчи эди. Бироқ дўконларнинг кетма-кет ёпилиши ортидан 2025 йил июнь ҳолатига келиб, фақатгина учта дўкон фаолият юритмоқда.
Қозоғистоннинг Magnum ритейл тармоғи Ўзбекистон бозорида кенгайиш режалари ҳақидаги кенг режаларига қарамасдан, сўнгги икки йилдаги амалий ривожланиш бу амбицияларнинг барбод бўлганидан дарак бермоқда.
EastFruit таҳлилчиларининг қайд этишича, 2025 йил июнь ҳолатига кўра, Магнумнинг Ўзбекистондаги савдо нуқталари сони атиги учта дўконга қисқарган. Бу эса аввал эълон қилинган дўконлар сонини 17 тага етказиш режасидан анча йироқ натижа ҳисобланади.
Magnum Cash&Carry — бу Қозоғистонда 200 дан ортиқ савдо нуқтасига эга бўлган, ҳар куни юз минглаб мижозларга хизмат кўрсатадиган йирик тармоқдир. Ўзбекистонга илк марта 2021 йил декабрь ойида кириб келган компания дастлаб Тошкентда икки гипермаркет очган эди. 2023 йил августида эса у Majid Al Futtaim LLC Uzbekistan компаниясининг бизнесини сотиб олиб, француз Carrefour тармоғининг собиқ дўконларини ўз балансига ўтказди. Бу орқали савдо нуқталари сони еттига етди.
Ушбу босқич компания учун халқаро бозорга чиқиш йўлида муҳим қадам сифатида баҳоланган. Яқин минтақадаги, маданий ва менталитет жиҳатдан ўхшаш бўлган мамлакатга кириш, потенциал жиҳатдан бошқа хорижий бозорлар учун трамплин сифатида кўрилган эди.
Компаниянинг логистика бўйича директори Михаил Филиппов 2023 1 ноябрь куни Олмаотада ўтказилган “Tradex” савдо форумида 2024 йилда Ўзбекистонда яна 10 та Magnum супермаркетлари очилишини айтиб ўтган эди.
Аммо 2024 йил бошидаёқ салбий ўзгаришлар кузатила бошлади: 23 февраль куни Magnum Қоратош дўкони ёпилди. Йил охиригача эса бирорта янги дўкон очилмади.
Бундан ташқари, 2025 йил май ойида яна икки дўкон — Magnum Юнусобод ва Magnum Atlas Чилонзор ёпилгани ҳақида хабарлар пайдо бўлди. Расмий равишда бу “бошқа манзилга кўчирилиши” сифатида эълон қилинди (Тошкент шаҳри, Бунёдкор кўчаси, 52-уй), бироқ бу манзилда тармоқ дўкони 2021 йилдан буён ишлаётгани сабабли бу амалда ёпилиш ҳисобланади.
Орадан бир ой ўтгач, 2025 йил 16 июнь куни ижтимоий тармоқларда яна бир дўкон — Magnum Samarqand Darvoza (Тошкент, Каратош кўчаси, 5А) ёпилгани ҳақида хабар пайдо бўлди. Pinkod нашри журналисти ҳам 5 июнь куни ушбу манзилга ташриф буюриб, дўкон ёпиқ эканини тасдиқлади.
Бундан ташқари, Узбекский Ритейл Телеграм-канали маълумотига кўра, қолган дўконларда ассортимент сезиларли даражада қисқараётган бўлиб, бу кўпинча ёпилиш олдидан кузатиладиган ҳолатдир. Шунга қарамай, ҳозиргача Магнум вакилларидан бу борада расмий баёнот берилмаган.
Шу тариқа, 2025 йил июнь ҳолатига кўра, Magnum Ўзбекистонда фақат пойтахтда жойлашган учта манзилда фаолият юритмоқда.
