“Микрокредитбанк” бошқарув раиси Ориф Бутаев қишлоқ хўжалиги вазири ўринбосари этиб тайинланди
Ориф Бутаев бир вақтнинг ўзида Чорвачилик ва яйлов хўжалигини ривожлантириш агентлигига ҳам раҳбарлик қилади. У тайинловга қадар 2020 йилдан буён “Микрокредитбанк” бошқарув раиси сифатида фаолият юритиб келаётган эди.
Президент қарори билан Ориф Бутаев Чорвачилик ва яйлов хўжалигини ривожлантириш агентлиги директори этиб тайинланди. Бу ҳақда президент матбуот котиби Шерзод Асадов хабар берди.
Бутаев ушбу лавозим билан бир вақтда қишлоқ хўжалиги вазири ўринбосари ҳам ҳисобланади.
У тайинловга қадар “Микрокредитбанк” акциядорлик-тижорат банки бошқарув раиси вазифасини бажарувчи лавозимида ишлаб келаётган эди.
Ориф Алибоевич Бутаев 1983 йилда Сурхондарё вилоятида туғилган. У 2006 йилда Тошкент давлат иқтисодиёт университетини “Банк иши” йўналиши бўйича, 2012 йилда эса Ўзбекистон Республикаси Банк-молия академиясини “Инвестицияларни бошқариш” мутахассислиги бўйича тамомлаган.
Бутаев меҳнат фаолиятини 2006 йилда Ўзбекистон Республикаси Марказий банкида бошлаган. Дастлаб Тижорат банкларига лицензия бериш ва улар фаолиятини тартибга солиш департаментида 1-тоифали иқтисодчи бўлиб ишлаган. Кейинги йилларда Марказий банк тизимида етакчи иқтисодчи, бош иқтисодчи, шўба мудири, бошқарма бошлиғи ўринбосари, бошқарма бошлиғи ҳамда департамент директори лавозимларида фаолият юритган.
2016–2018 йилларда у Марказий банкнинг Кредит ташкилотлари фаолиятини лицензиялаш ва тартибга солиш департаментига раҳбарлик қилган. 2018 йилда Кредит ахборотининг давлат реэстрини юритиш департаменти директори бўлган. 2018–2019 йилларда эса Ўзбекистон Республикаси Марказий банки раиси ўринбосари лавозимида ишлаган.
2019 йил ноябридан 2020 йил февралигача “Ўзсаноатқурилишбанк” АТБ бошқарув раисининг биринчи ўринбосари бўлган. 2020 йилдан буён “Микрокредитбанк” тизимида раҳбарлик лавозимларида ишлаб келган. Хусусан, 2020 йил февралидан 2024 йил мартигача банк бошқарув раиси, 2024 йил мартидан эса банк бошқарув раиси вазифасини бажарувчи сифатида фаолият юритган.
Аввалроқ “Асакабанк” бошқарув раиси Олмазор тумани ҳокими этиб тайинланган эди.
