Жаҳон бозорида олтин нархи яна рекорд ўрнатди. Бунинг сабаби нима?
Сўнгги кунларда олтин нархи жаҳон бозорида кетма-кет рекордларни янгиламоқда.
Хусусан, 22 сентябрь куни олтин нархи бир троя унция учун $3 720 дан ошиб, янги рекорд қайд этди.
Олтин нархи нега ўсаётгани ҳақида батафсил:
22 сентябрь куни жаҳон бозорида олтин нархи яна бир тарихий рекорд янгилади. Кундалик савдоларда олтиннинг энг юқори нархи бир унция учун $3 726,19 га етди.
Хабар тайёрланаётган пайтда эса қимматбаҳо металл $3 723 дан савдо қилинмоқда. Бир грамм тоза олтин эса $120,35 ни ташкил қилмоқда.
Шунингдек, АҚШнинг декабрь ойида етказиб бериладиган олтин фьючерслари ҳам 1,4% га ошиб, $3 758,40 даражасига чиқди.
Мутахассисларнинг фикрича, нархларнинг кўтарилишига Федерал резерв тизимидан (Fed) юмшоқроқ фоиз ставкалари сиёсати кутилётгани сабаб бўлмоқда. Бу ҳафта бир нечта Фед расмийлари чиқишлари ҳамда муҳим инфляция кўрсаткичлари эълон қилиниши кутилмоқда.
UBS таҳлилчиси Жованни Стауново олтин нархи бу ҳафта яна рекорд янгилашини айтмоқда. Унинг сўзларига кўра, Fed қўшимча ставка пасайтиришларини билдириш эҳтимоли юқори, бироқ тезлик ва ҳажм бўйича қарорлар янги маълумотларга боғлиқ бўлади.
Ушбу ҳафтада бир нечта Fed расмийлари чиқиш қилиши кутилмоқда. Сешанба куни резерв раиси Жером Пауэлл нутқ сўзлайди ва инвесторлар унинг шарҳларини монетар сиёсатнинг келажак йўналишига оид ишоралар сифатида диққат билан кузатмоқда.
Шунингдек, жума куни АҚШнинг асосий шахсий истеъмол харажатлари (PCE) нархлари бўйича маълумотлар эълон қилиниши режалаштирилган бўлиб, бу келгуси ставка пасайтиришларининг тезлигини белгилашда муҳим кўрсаткич бўлади.
17 сентябрь куни Fed асосий ставкани 25 базавий пунктга тушириб, 4,00–4,25% диапазонига келтирди. Инвесторлар йил якунига қадар октабр ва декабрь ойларида ҳам яна 25 пунктлик пасайиш бўлишини кутмоқда.
Сўнгги пайтларда олтин бозоридаги талаб манбалари ҳам ўзгариб бормоқда. Аввал асосан марказий банклар ва Осиё мамлакатлари харидларни оширган бўлса, энди Ғарб инвесторларининг ҳам ўз инвестиция портфелига олтин қўшаётгани кузатилмоқда. Бу жараён олтин ЭТФълари ҳажмининг ортишида яққол кўринмоқда.
Аввалроқ Pinkod Goldman Sachs олтин нархи бўйича прогнозини янгилагани ҳақида ёзган эди.
Банкнинг асосий сценарийсига кўра, 2026 йилнинг ўрталаригача бир унция олтин 4 минг долларгача чиқиши мумкин. Агар Федерал захира тизими мустақиллигига путур етса, нарх янада кескин ошиб, 5 минг долларгача етиши эҳтимол сифатида айтилмоқда.
