“Ипотека банк” III чоракда фойда кўришга қайтди
9 ой якунларига кўра, банкнинг соф фойдаси 102,5 млрд сўмни ташкил этди. Фақатгина III чоракда банк 495 млрд сўм соф фойда кўрди.
“Ипотека банк” 2025 йилнинг 9 ойи якунлари бўйича молиявий ҳисоботини эълон қилди. Ҳисоботга кўра, банк учинчи чоракда фойдага чиқиб, молиявий барқарорликни тиклади.
Январь–сентябрь ойларида банкнинг соф фойдаси 102,5 млрд сўмни ташкил этди (ўтган йилнинг шу даврига нисбатан 45,8% камроқ). Фақатгина III чоракда эса банк 495,0 млрд сўм соф фойда кўрди. Бу натижа II чоракдаги 392,5 млрд сўмлик зарарни тўлиқ қоплаб, ижобий динамика қайтганини кўрсатмоқда.
Кредит ва лизинг бўйича эҳтимолий йўқотишлар учун ажратилган захиралар чорак давомида 2,9 трлн сўмдан 3,5 трлн сўмгача ошди. Таққослаш учун, 2024 йилнинг III чорагида бу кўрсаткич 1,5 трлн сўм эди. Натижада йиллик ўсиш 137,9 фоизни ташкил этди.
Ҳисобот даврида банк 8,3 трлн сўмлик фоизли даромадлар олди. Бироқ кредит ва лизинг йўналишидаги эҳтимолий зарарлар туфайли бу йўналишда салбий натижа кўрсатилган. Шу билан бирга, банкнинг фоизсиз даромадлари 3 трлн сўмга етди.
Харажатлар қисмида эса ходимларга тўланадиган маош ва бошқа операцион харажатлар учун 884,4 млрд сўм сарфланди. Шунингдек, банк 3 млрд сўм даромад солиғи тўлади.
