Fitch 2025 йил учун глобал иқтисодий ўсиш прогнозини оширди

Fitch Ratings агентлиги 2025 йилда жаҳон иқтисодий ўсиши прогнозини бироз юқорига кўтарди. Бу ҳақда WSJ хабар берди.

Мазкур қарор АҚШ иқтисодиётига нисбатан хавотирлар кучаяётганига қарамай қабул қилинган. Агентликнинг таъкидлашича, Хитой ва Европада иқтисодий фаоллик кутилганидан яхшироқ кўринмоқда.

Fitch маълумотларига кўра, АҚШ иқтисодиёти секинлашаётганига оид аниқ далиллар мавжуд. Шунга қарамай, агентлик глобал ўсиш прогнозини июндаги 2,2% дан 2,4% га оширди. Бироқ бу кўрсаткич ўтган йилги 2,9% дан барибир паст.

Хитой учун ўсиш прогнози ҳам кўтарилиб, 4,2% ўрнига 4,7% га етказилди. Евроиттифоқ бўйича эса прогноз 0,8% дан 1,1% га оширилган. Fitch бу ҳолатни АҚШнинг янги тариф сиёсатига боғлиқ бўлган олдиндан харид қилиш фаоллиги билан изоҳлади.

Шу билан бирга, агентлик АҚШ иқтисодиёти бўйича ҳам прогнозини янгилади: жорий йил учун ўсиш 1,5% ўрнига 1,6% бўлиши кутилмоқда. Fitch ҳисоб-китобларига кўра, АҚШнинг ўртача самарали тариф ставкаси 16% атрофида қолмоқда.

Fitch бош иқтисодчиси Браян Коултоннинг сўзларига кўра, тарифларнинг оширилиши глобал иқтисодий ўсишга босим ўтказишда давом этади. Бироқ Хитой экспортининг сезиларли ўсиши бу таъсирни юмшатмоқда. Бунга номинал алмашув курсининг пасайиши ва экспорт нархларининг тушиши ёрдам бермоқда.

АҚШ меҳнат бозоридаги секинлашув эса Федерал Резервни фоиз ставкаларини кутилганидан тезроқ пасайтиришга ундаши мумкин. Fitch прогнозига кўра, 2025 йил сентабр ва декабрь ойларида ҳар сафар 25 базавий пунктдан икки марта, 2026 йилда эса яна уч марта пасайтириш режалаштирилмоқда.

Агентлик 2026 йил учун глобал иқтисодий ўсиш прогнозини ҳам қайта кўриб чиқиб, 2,2% ўрнига 2,3% бўлишини кутмоқда.

Аввалроқ Fitch Ratings Ўзбекистоннинг хорижий валютадаги узоқ муддатли кредит рейтингини “ББ-” дан “ББ” даражасига кўтаргани хабар қилинганди. Бу рейтингга нисбатан прогноз эса — “барқарор” бўлиб қолмоқда.