Билл Гейтс ўқишни тавсия қилган 5 та китоб

Технология ва хайрия соҳаларида дунё миқёсидаги етакчи шахслардан бири бўлган Билл Гейтс ҳар йили ўзи ўқиб, энг катта таассурот қолдирган китоблар рўйхатини жамоатчилик билан бўлишади.

Pinkod’нинг бу галги китоб тавсиялари рукнида Гейтс томонидан юксак баҳоланган ва чуқур мазмуни билан ажралиб турадиган бешта асар ҳақида маълумот берилади.

How the World Really Works (Дунё аслида қандай ишлайди?) – Вацлав Смил

Бу асарда энергетика, озиқ-овқат таъминоти, ишлаб чиқариш ва глобал тизимлар ҳақида илмий ва статистик асосланган таҳлиллар берилган. Вацлав Смил инсоният тараққиётига таъсир қилаётган асосий кучларни оддий, аммо чуқур тилда тушунтиради. Билл Гейтс бу китобни “инсон ҳаётини шакллантирувчи кучлар ҳақида қисқа, лекин чуқур сабоқлар берувчи манба” деб таърифлайди.

Why We're Polarized (Нега биз қутблашяпмиз?) – Эзра Клайн

Сиёсий тизимдаги чуқур ажралишлар ва улар инсон идентификацияси билан қандай боғлиқлиги ҳақида пухта таҳлил. Китоб бугунги жамиятдаги бўлинишлар сабабини фақат сиёсий эмас, балки психологик, ижтимоий ва маданий омиллар билан изоҳлайди. Гейтс уни “инсон психологиясига оид ҳайратланарли таҳлил” деб баҳолаган.

Business Adventures (Бизнес саргузаштлари) – Жон Брукс

Молиявий дунёдаги 12 та муҳим воқеа асосида ёзилган ушбу китоб Билл Гейтснинг энг севимли бизнес асари саналади. General Electric, Xerox, Ford Motor каби йирик компаниялар тарихидаги ютуқ ва инқирозлар орқали муаллиф бизнес қарорларининг узоқ муддатли оқибатларини ёритади. Китоб нафақат тадбиркорлар, балки бошқарувни чуқур тушунмоқчи бўлган ҳар бир ўқувчи учун фойдали.

Factfulness – Ҳанс Рослинг

Муаллиф глобал статистик маълумотлар асосида одамларнинг дунё ҳақидаги нотўғри тасаввурларини фош этади. Китобда одамлар реал ҳолатни баҳолашда йўл қўядиган 10 та асосий фикрлаш хатолиги таҳлил қилинади. Билл Гейтс бу асарни “энг фойдали ва ўқитувчи китоблардан бири” деб ҳисоблайди. Айниқса журналистлар, сиёсатчилар ва ўқитувчилар учун тавсия этилади.

The Coming Wave (Келажак тўлқини) – Мустафо Сулеймон

DeepMind ва Microsoft AI асосчиларидан бири бўлган Мустафо Сулеймон бу китобда сунъий интеллект, синтетик биология, геном таҳрири каби илғор технологияларнинг инсоният келажагига таъсирини ёритади. Муаллиф бу технологиялар имкониятларини, шу билан бирга, улар билан боғлиқ хавф-хатарларни ҳам реал мисоллар орқали таҳлил қилади. 

Мавзуга доир: Билл Гейтсдан сунъий интеллект ҳақида барча ўқиши зарур бўлган китоб тавсияси.

Гейтс бу асарни сунъий интеллект ҳақида чуқур тушунча ҳосил қилишни истаганлар учун энг яхши танлов деб атайди.