Банклардаги муаммоли кредитлар 2025 йил илк чорагида 2,3 трлн сўмга кўпайди

2025 йилнинг биринчи чорагида банклардаги муаммоли кредитлар ҳажми 2,3 трлн сўмга ошди ва жами 23,5 трлн сўмга тенг етди. Бу ҳақда Марказий банк томонидан эълон қилинган ҳисоботда келтириб ўтилган. Шунингдек, мазкур даврда банклар жами кредит портфели 18,7 трлн сўмга ошиб, 551,8 трлн сўмни ташкил қилди.

Давлат банклари

Давлат улуши мавжуд банклар биринчи чоракда кредит ажратишда етакчиликни сақлаб қолди. Уларнинг умумий кредит портфели 12,9 трлн сўмга ошиб, 1 апрель ҳолатига кўра 379,6 трлн сўмни ташкил қилмоқда. Энг катта кредит портфели Ўзмиллийбанкда бўлиб, банк портфели 0,6 трлн сўмга кўпайди. Энг катта ўсишни эса Агробанк қайд этган — 5,2 трлн сўмлик ўсиш билан портфели 64,6 трлн сўмга етган.

Давлат банкларининг муаммоли кредитлари эса 1,8 трлн сўмга кўпайиб, 16,1 трлн сўмдан ошди. Бу борада энг йирик ўсиш Ўзсаноатқурилишбанкда кузатилган — банкда NPL ҳажми қарийб 1 трлн сўмга ошиб, 2,8 трлн сўмни ташкил этган.

Хусусий банклар

Давлат улуши мавжуд бўлмаган банкларда эса кредит портфели 5,8 триллион сўмга ошиб, умумий ҳажм 172,2 триллион сўмга етди. Бу тоифадаги банклар орасида энг йирик портфелга Ипотека банк эга бўлса-да (34,4 трлн сўм), ушбу банк портфелийил бошига нисбатан  0,7 трлн сўмга камайган.

TBC Bank энг фаол банк сифатида ажралиб турган бўлиб, чорак давомида ташкилотнинг кредит портфели 1,8 триллион сўмга ортиб, 9,2 триллион сўмга етди.

Хусусий банклар орасида муаммоли кредитлар ортишида TBC Bank (+144 млрд сўм), Капиталбанк (+177 млрд сўм) ва Orient Finans Bank (+121 млрд сўм) етакчи бўлди.

Шунингдек, кредит портфели ҳажмига нисбатан энг юқори NPL даражаси Гарант Банк’да қайд этилган — муаммоли кредитлар банкнинг умумий портфелининг 23,4 фоизини ташкил қилган ва чорак якунида 8,6 фоизга ошган.