Алишер Усмонов Forbes миллиардерлар рейтингида Ўзбекистон вакили сифатида қайд этилди

Forbes журнали ҳар йили эълон қиладиган дунёнинг энг бой инсонлари рўйхатида бу йил ўзгариш кузатилди. Ўзбекистон учун айниқса аҳамиятли бўлган янгилик шундаки, Алишер Усмонов илк бор ушбу рўйхатда Ўзбекистон вакили сифатида қайд этилди.

USM Holdings асосчиси бўлган Алишер Усмонов аввалги йилларда Россия вакили сифатида кўрсатилган эди. Бироқ, эндиликда Forbes уни расмий равишда Ўзбекистон тадбиркори сифатида эътироф этди. Унинг бойлиги ўтган йилга нисбатан $3,3 миллиардга ортиб,  ҳозирда $16,7 миллиардни ташкил этмоқда. Шунингдек, Усмонов жаҳон рейтингида 144-ўриндан 125-ўринга кўтарилди.

Алишер Усмонов 2022 йилдан бери Тошкентда яшаётгани сабабли Forbes уни Ўзбекистон тадбиркори сифатида эътироф этган бўлиши мумкин.

Алишер Усмонов Ўзбекистоннинг энг нуфузли тадбиркорларидан бири бўлиб, 1953 йил 9 сентябрда Наманган вилоятида туғилган. У Москвадаги Халқаро муносабатлар институтини тамомлаган ва фаолиятини саноат тармоқларида бошлаган. Дастлаб, у пластик пакетлар ишлаб чиқариш орқали дастлабки капиталини тўплаган. Собиқ Совет Иттифоқида бундай маҳсулотлар жуда камёб бўлгани сабабли одамлар уларни ювиб, қайта ишлатишган.

Усмонов кейинчалик металлургия, телекоммуникация ва IT соҳаларига сармоя киритиб, дунёнинг энг муваффақиятли бизнесменларидан бирига айланди. Унинг энг катта активларидан бири Металлоинвест компаниясидаги улушидир. Шунингдек, у Xiaomi ва бошқа телекоммуникация, тоғ-конь саноати ва медиа компанияларида ҳам улушга эга.

Усмонов 2000 йилдан 2014 йилгача Россиянинг давлатга қарашли Gazprom компаниясининг Gazprom Investholding шўба корхонасига раҳбарлик қилган. У, шунингдек, Facebook’нинг дастлабки инвесторларидан бири ҳисобланади.

Спорт соҳасида ҳам фаол бўлган Усмонов собиқ қиличбоз бўлиб, 2022 йилгача Халқаро қиличбозлик федерацияси президенти лавозимида ишлаган.