Энг катта қулаш: NVIDIA’нинг бозор қиймати бир куннинг ўзида деярли $600 млрдга камайди
Хитойнинг сунъий интеллект стартапи муваффақияти АҚШ компаниялари акцияларини қулатмоқда.
NVIDIA акциялари душанба куни 17% га тушиб, компаниянинг бозор қиймати тахминан $600 миллиардга камайди — бу АҚШ тарихидаги энг катта бир кунлик йўқотишдир. Бу кескин тушиш технология сектори бўйлаб тарқалди ва Nasdaq индексини 3,1% га пасайтирди. Nvidia чипларига таянадиган маълумот марказлари компаниялари ҳам катта зарар кўрди. АҚШ компаниялари кўрган умумий зарар эса $1трлн дан ошган.
Асосий зарарлар:
- NVIDIA акциялари 17% га пасайиб, бир куннинг ўзида деярли $600 млрд йўқотди. Бу АҚШ компаниялари тарихидаги бир кунлик энг юқори қулашдир.
- Компания бош директори Женсон Хуангнинг бойлиги бунинг натижасида $124,4 млрддан $103,7 млрдга пасайди ва бу уни Forbes миллиардерлар рейтингида 10-ўриндан 17-ўринга улоқтирди.
- Бир ҳафта олдин NVIDIA AI чип бозоридаги устунлиги туфайли Apple’ни ортда қолдириб, дунёнинг энг қиммат компаниясига айланган эди. Бироқ, душанба куни Хитой рақобатчиларининг тезлашаётган ривожи NVIDIA’нинг позициясини заифлигини очиб берди.
Бошқа зарарлар:
- Oracle акциялари 14% га пасайди. Бунинг натижасида унинг директори Ларри Элсоннинг бойлиги $27,6 млрдга камайиб, уни куннинг энг катта мағлубига айлантирди.
- Бундан ташқари, Microsoft, DELL ва ASML каби бошқа технологик гигантлар ҳам акциялари қийматининг камайишини бошдан кечирди.
Нега акциялар қуламоқда?
DeepSeek AI эффекти. Хитойлик стартап DeepSeek атиги $6 миллион сармоя билан ChatGPT ва Gemini каби рақобатчиларни турли кўрсаткичларда ортда қолдирди. Бу ҳолат AI технологияларига қилинган миллиардлаб сармояларнинг самарадорлигига шубҳа уйғотди. Инвесторлар “AI пуфакчаси” хавфи ҳақида хавотирлана бошлади. Маблағларини йўқотишдан қўрққан инвесторлар табиийки ўз акцияларини сотишни бошлашди.
Мавзуга доир: Хитойнинг кичик бир AI лойиҳаси қандай қилиб техногигантларнинг триллион доллар йўқотишига сабаб бўлмоқда?
