Fevral oyida “Ipoteka bank” OTP Group’ning koʻp yillardan beri faoliyat yuritib kelayotgan xodimi ish jarayonida sogʻligi yomonlashgani sababli shifoxonaga yotqizilgan. Biroq xodim kasalxonada vafot etgan.

Maʼlum qilinishicha, “Ipoteka bank” OTP Group marhum xodim — Qozoqov Qahramon Abdullayevichning vafoti munosabati bilan chuqur va samimiy hamdardlik bildirib, uning oilasi va yaqinlariga taʼziya izhor etgan.

Bank rahbariyati vafot etgan xodimning oilasini qoʻllab-quvvatlash maqsadida ichki normativ hujjatlarga muvofiq moliyaviy yordam koʻrsatish toʻgʻrisida qaror qabul qildi.

Xususan, oila boquvchisini yoʻqotgani munosabati bilan taxminan 44,5 mln soʻm miqdorida moddiy yordam oladi.

Bundan tashqari, yillik bonus sifatida oilaga 38 mln soʻmdan ortiq mablagʻ toʻlab berilishi belgilangan.

Shuningdek, bank hamdardlik va oilani qoʻllab-quvvatlash maqsadida marhum xodimning 257 mln soʻmdan ortiq ipoteka qarzini toʻliq qoplash toʻgʻrisida qaror chiqargan.

“Bank Qozoqov Qahramon Abdullayevichning bank rivojiga qoʻshgan hissasi uchun chin dildan minnatdorlik bildiradi va yana bir bor uning oila aʼzolari, yaqinlari hamda doʻstlariga chuqur hamdardlik izhor qiladi”, — deyiladi xabarda.

“Ipoteka bank” vafot etgan xodimining oilasiga moddiy yordam ajratib, uning ipoteka qarzini toʻliq qoplaydi