Oʻzbekistonda qariyb 150 ming fuqaro oʻz ixtiyori bilan kredit olishni taqiqlagan. Bu haqda Kredit-axborot tahlil markazi (KATM) oʻzining Telegram-kanalida maʼlum qildi.

Maʼlumotlarga koʻra, 1-oktabr holatiga 149 465 nafar jismoniy shaxs bepul “Kreditga taqiq” xizmatiga ulangan.

Gender kesimida erkaklar aniq ustunlik qiladi. Erkaklar 101,4 mingni, ayollar esa 47,9 ming kishini tashkil etadi. Shunday qilib, xizmat foydalanuvchilarining qariyb 68 foizi erkaklardir.

Yosh toifalari boʻyicha, eng faol foydalanuvchilar — 26–35 yoshdagilar boʻlib, ular barcha foydalanuvchilarning uchdan bir qismini tashkil etadi. Keyingi oʻrinlarda 36–45 yoshdagilar (25,6%) va 26 yoshgacha boʻlganlar (19,2%) joy olgan.

Xizmat ishga tushgan iyun oyida 33,1 ming kishi undan foydalangan boʻlsa, keyingi oylarda bu koʻrsatkich barqaror oʻsdi:

iyulda — 37,6 ming;
avgustda — 37,8 ming;
sentabrda — 40,8 ming kishi.

Oktabr oyi uchun maʼlumotlar hali eʼlon qilinmadi.

“Kreditga taqiq” xizmatini yoqish yoki oʻchirishning toʻrt xil usuli mavjud:

1. KATM mobil ilovasi orqali;

2. Portal.infokredit.uz saytida shaxsiy kabinet orqali;

3. My.gov.uz portali orqali;

4. Davlat xizmatlari markazlari orqali.

Xizmatdan foydalanish mutlaqo bepul.

Oʻz-oʻziga kredit olishni taqiqlash xizmatidan asosan erkaklar foydalanmoqda