2025 yil yakunlari boʻyicha Oʻzbekistonning ikki yirik oltin koni — Muruntov va Olmaliq dunyoda eng koʻp oltin ishlab chiqarilgan konlar reytingidan joy oldi.

MINING.COM tomonidan S&P Global maʼlumotlari asosida tuzilgan reytingda Muruntov 2-oʻrinni, Olmaliq esa 6-oʻrinni egallagan.

Reytingga koʻra, Muruntov konida 2025 yilda 1,708 mln unsiya, yaʼni qariyb 53,1 tonna oltin ishlab chiqarilgan. Bu 2024 yilga nisbatan 4 foizga yuqori koʻrsatkich hisoblanadi. Olmaliq kon-metallurgiya kompleksi esa 750 ming unsiya yoki taxminan 23,3 tonna oltin ishlab chiqargan. Bu koʻrsatkich 2024 yil darajasida saqlanib qolgan.

TOP-10 roʻyxatga qaysi konlar kirdi?

2025 yilda eng koʻp oltin ishlab chiqarilgan konlar reytingida birinchi oʻrinni AQShdagi Nevada Gold Mines kompleksi egalladi. U 2,595 mln unsiya, yaʼni qariyb 80,7 tonna oltin ishlab chiqargan. Mazkur kompleks Barrick va Newmont kompaniyalarining qoʻshma loyihasi boʻlib, 10 ta yerosti va 12 ta ochiq konni oʻz ichiga oladi.

Ikkinchi oʻrinda Oʻzbekistonning Muruntov koni qayd etildi. U Navoiy kon-metallurgiya kompaniyasi tarkibidagi eng muhim aktivlardan biri hisoblanadi. 2025 yilda Muruntov 1,708 mln unsiya oltin ishlab chiqarib, Rossiyadagi Olimpiada, Indoneziyadagi Grasberg va Qozogʻistondagi Kazzinc kabi yirik konlarni ortda qoldirdi.

Uchinchi oʻrinni Rossiyadagi Olimpiada koni egalladi. Polyus kompaniyasiga qarashli ushbu kon 2025 yilda 1,357 mln unsiya oltin ishlab chiqargan.

Toʻrtinchi oʻrinda Qozogʻistondagi Kazzinc Consolidated kompleksi joylashdi. U 947 ming unsiya oltin ishlab chiqargan. Beshinchi oʻrinni esa Indoneziyadagi Grasberg koni egalladi. Grasberg 2025 yilda 937 ming unsiya oltin ishlab chiqargan, biroq ishlab chiqarish hajmi 2024 yilga nisbatan keskin kamaygan. Bunga 2025 yil sentabrida yuz bergan halokatli koʻchki va operatsiyalarning vaqtincha toʻxtatilgani sabab boʻlgan.

Oʻzbekistonning ikkinchi vakili — Olmaliq kon-metallurgiya kompleksi reytingda 6-oʻrinni egalladi. Kompleks 2025 yilda 750 ming unsiya oltin ishlab chiqargan. Shu bilan birga, Olmaliq nafaqat oltin, balki Oʻzbekiston mis sanoatida ham muhim oʻrin tutadi. Manba maʼlumotida u mamlakat mis ishlab chiqarishining 90 foizdan ortigʻini taʼminlashi qayd etilgan.

2025 yilda eng koʻp oltin ishlab chiqarilgan 10 ta kon:

Oʻrin	Kon / kompleks	Mamlakat	2025-yil ishlab chiqarish	Taxminan tonnada
1	Nevada Gold Mines	AQSh	2,595 mln unsiya	80,7 tonna
2	Muruntov	Oʻzbekiston	1,708 mln unsiya	53,1 tonna
3	Olimpiada	Rossiya	1,357 mln unsiya	42,2 tonna
4	Kazzinc Consolidated	Qozogʻiston	947 ming unsiya	29,5 tonna
5	Grasberg	Indoneziya	937 ming unsiya	29,1 tonna
6	Olmaliq	Oʻzbekiston	750 ming unsiya	23,3 tonna
7	Blagodatnoye	Rossiya	736 ming unsiya	22,9 tonna
8	Detour Lake	Kanada	693 ming unsiya	21,6 tonna
9	Kibali	Kongo DR	673 ming unsiya	20,9 tonna
10	Ahafo	Gana	664 ming unsiya	20,7 tonna

Markaziy bankning eng soʻnggi maʼlumotlariga koʻra, 2026 yil 1 may holatida Oʻzbekistonning oltin-valyuta zaxiralari 70,9 mlrd dollarga yetgan. Zaxiralarning asosiy qismini oltin aktivlari tashkil etib, ularning qiymati 61,6 mlrd dollar atrofida baholangan. Xorijiy valyutadagi aktivlar esa 8,7 mlrd dollarni tashkil qilgan.

Oʻzbekistondagi Muruntov va Olmaliq konlari dunyoda eng koʻp oltin qazib olinadigan TOP-10 kon qatoriga kirdi

OKMK sof foydasi birinchi chorakda 4,72 trln soʻmga yetdi

“Yoshlik-1” va “Qalmoqqir” konlaridagi mis va oltin zaxiralari kamida 100 yilga yetadi

OKMK 9 oyda qariyb 700 mln dollar sof foyda oldi