Yevropa tiklanish va taraqqiyot banki (YTTB) Markaziy Osiyo mamlakatlari va Moʻgʻuliston iqtisodiyoti 2025 yilda oʻrtacha 6,1 foizga oʻsishini prognoz qilmoqda. Bu haqda bankning mintaqaviy iqtisodiy koʻrsatkichlarga bagʻishlangan hisobotida qayd etilgan.

Barqaror oʻsishning asosiy omillari sifatida sanoat ishlab chiqarish hajmining kengayishi, ichki talabning yuqoriligi, investitsiyalar oqimi, real ish haqlarining oshishi hamda pul oʻtkazmalarining sezilarli hajmi koʻrsatib oʻtilgan.

2026 yilda ham ijobiy dinamikaga erishilishi kutilmoqda, biroq iqtisodiy oʻsish surʼatlari 5,2% gacha pasayishi ehtimol qilinmoqda. Hisobotda asosiy xatarlar sifatida xomashyo narxlarining oʻzgaruvchanligi, pul oʻtkazmalariga yuqori darajadagi bogʻliqlik va Rossiya hamda Xitoy bozorlariga doimiy qaramlik taʼkidlangan.

YTTB maʼlumotlariga koʻra, Oʻzbekiston iqtisodiyoti 2025 yilning birinchi yarmida 7,2 foizgacha tezlashgan. Bunga kuchli ichki talab, real ish haqlarining oʻsishi va pul oʻtkazmalarining 28,7 foizga koʻpayishi xizmat qilgan. Natijada xizmatlar sektori 8,2 foizga kengaydi.

Shuningdek, oziq-ovqat va metallurgiya mahsulotlari ishlab chiqarishining oʻsishi sanoat koʻrsatkichlarini yaxshilagan. Togʻ-kon sohasi esa jahon bozorida oltin narxlarining oshishi hisobiga foyda koʻrib, tabiiy gaz qazib olishdagi pasayishni qoplashga yordam berdi.

Prognozlarga koʻra, Oʻzbekistonning yalpi ichki mahsuloti (YaIM) 2025 yilda 6,7 foiz, 2026 yilda esa 6 foizga oʻsishi kutilmoqda. Bunga kuchli ichki isteʼmol, investitsiyalar oqimi va xorijiy kapital ishtirokida diversifikatsiyalangan ishlab chiqarishning barqaror kengayishi asos boʻladi.

Shuningdek, YTTB prognozlariga koʻra:

Qozogʻiston iqtisodiyoti 2025 yilda 5,7 foiz, 2026 yilda 4,5 foizga oʻsadi;
Qirgʻiziston — mos ravishda 9 foiz va 6 foiz;
Moʻgʻuliston — 5,8 foiz va 5,5 foiz;
Tojikiston — 7,5 foiz va 5,7 foiz;
Turkmaniston esa 2025–2026 yillarda oʻrtacha 6,3 foiz oʻsish surʼatini saqlab qolishi kutilmoqda.

Oʻzbekiston iqtisodiyoti 2025 yilda qanchaga oʻsishi kutilmoqda? — YTTB prognozi