OpenAI oʻzining eng yangi tasvir generatsiyasi modeli — GPT Image Model 1.5’ni rasman taqdim etdi. Kompaniyaga koʻra, ushbu model avvalgi versiyalarga nisbatan foydalanuvchi koʻrsatmalarini ancha aniq bajaradi va yanada real hamda batafsil tasvirlar yaratish imkonini beradi.

GPT-Image Model 1.5 bugundan boshlab barcha ChatGPT foydalanuvchilari uchun global miqyosda foydalanishga ochildi. Shuningdek, u ishlab chiquvchilar uchun API orqali GPT-Image-1.5 nomi bilan ham taqdim etilgan.

Eng muhim yangiliklardan biri — ChatGPT interfeysida tasvir yaratish uchun maxsus ajratilgan yangi boʻlim ishga tushirilgani. Ushbu boʻlim yon panelda joylashgan boʻlib, unda oldindan sozlangan uslublar, mashhur dizaynlar va vizual kontentga moslashtirilgan muhit mavjud. Bu esa oddiy chat orqali rasm yaratishdan tubdan farq qiladi va OpenAI’ning vizual kontentga jiddiy eʼtibor qaratayotganini koʻrsatadi.

OpenAI maʼlumotlariga koʻra, GPT-Image Model 1.5 avvalgi versiyaga nisbatan toʻrt baravar tezroq ishlaydi, murakkab va aniq koʻrsatmalarni yanada toʻgʻri talqin qiladi hamda professional darajadagi tahrirlash imkoniyatlarini taklif etadi.

Yangi model yordamida foydalanuvchilar rasmga aniq obʼektlarni qoʻshish yoki olib tashlash, alohida elementlarning uslubini oʻzgartirish, kiyim-kechakni virtual tarzda “kiyib koʻrish”, shuningdek tasvir ichidagi detallarni nozik darajada tahrirlash imkoniga ega boʻladi. Ushbu funksiyalar dizaynerlar, kontent yaratuvchilar va marketologlar uchun ayniqsa muhim boʻlib, sunʼiy intellekt yordamida vizual kontent yaratish jarayonini yanada tez, qulay va samarali qiladi.

Yangi model taqdimoti Disney va OpenAI oʻrtasida imzolangan yirik kelishuvdan atigi bir hafta oʻtib eʼlon qilindi. Ushbu kelishuvga koʻra, Disneyʼning 200 dan ortiq mashhur qahramonlari kelajakda ChatGPT tasvirlari va Sora AI videolariga integratsiya qilinadi.

Hozircha GPT-Image Model 1.5 orqali Disney qahramonlarini yaratish imkoni yoʻq — bu funksiyalar 2026 yil boshida joriy etilishi rejalashtirilgan. Shunga qaramay, yangi model allaqachon taniqli superqahramonlar va mashhur obrazlarga oʻxshash vizual kontent yaratishni ancha osonlashtirmoqda.

OpenAI ChatGPT-Image 1.5 tasvir generatorini taqdim etdi

OpenAI sunʼiy intellekt yordamida toʻliq metrajli animatsion film yaratmoqda