UZCARD SMS xizmatlarini taqdim etuvchi Play Mobile MChJ tizimdagi kiruvchi xabarlar tariflarining oʻzgarishi haqida eʼlon qildi.

2025 yil 1 martdan boshlab Beeline, Humans, Perfectum, Ucell, Mobiuz va UzMobile operatorlari abonentlari uchun 5800 raqamidan yuborilgan har bir SMS narxi endilikda 84,2 soʻm oʻrniga 168,40 soʻmni tashkil etadi.

“SMS-trafik hajmi 75% ga oshganligi, shunga qaramay joriy SMS-xabardorlik tariflari 2019 yildan beri oʻzgarmaganligi, dasturiy-apparat majmuasini xizmat koʻrsatish xarajatlarini sezilarli darajada oshirdi”, — dedi kompaniya matbuot xizmati.

Xabarda soʻnggi yillarda elektr energiyasi narxi 100% ga, bazaviy hisoblash miqdori 68% ga, aloqa operatorlari tomonidan SMS xizmati uchun olinadigan oʻrtacha narx esa 300% ga koʻtarilgani narxlar oshirilishiga sabab sifatida koʻrsatilgan.

Bundan tashqari, UZCARD’ga tegishli CardXabar Telegram botining xizmat koʻrsatish narxlari ham oʻzgarmoqda. 1 martdan boshlab amaldagi 1 000 soʻm oʻrniga oʻzgaruvchan paketlar amal qilishni boshlaydi. Paketlar narxi 5 ming soʻmdan(250 tagacha kiruvchi xabarlar uchun) 500 ming soʻmgachani tashkil qiladi.

UZCARD kartalari uchun SMS xizmatlari 2 baravarga qimmatlamoqda