Oltin bozori dunyo boʻylab investorlarda katta qiziqish uygʻotishda davom etmoqda. 2024 yilda oltin bir unsiya uchun tarixdagi rekord summa – $2,790 gacha chiqdi.

Oltin narxi 2025 yilda ham yuqorilab, rekordlarni yangilashda davom etadimi? Moliyaviy institutlar va tahlilchilar bu borada ancha yaxshi prognozlar berishmoqda.

Nima uchun oltin xavfsiz investitsiya hisoblanadi?

Oltin oʻzining ichki qiymati, kamyobligi va iqtisodiy pasayishlar va geosiyosiy inqirozlar davridagi tarixiy koʻrsatkichlari tufayli xavfsiz investitsiya deb hisoblanadi. U inflyatsiya va valyuta qadrsizlanishiga qarshi himoya vositasi sifatida xizmat qiladi.

Institutsional prognozlar

Goldman Sachs (Amerikaning transmilliy investitsiya banki va moliyaviy xizmatlar kompaniyasi – tahr.) 2025 yil oxiriga borib oltin narxi bir troya unsiyasi uchun $3,000 ga yetishini prognoz qilmoqda. Ushbu prognoz dunyo markaziy banklarining 2024 yilda rekord darajada oʻsgan xaridlari va AQSh iqtisodiyotini barqarorlashtirishga qaratilgan Federal Rezerv stavkalarini pasaytirish choralari bilan izohlanadi.

Bank of America (depozitlarining miqdori boʻyicha AQShdagi eng katta tijorat banklaridan biri – tahr.) Goldman Sachs’ga hamohang ravishda, oltin narxlari 2025 yilda $3,000 ga yetishini taxmin qilmoqda. Ular bu prognozni iqtisodiy noaniqlik va inflyatsiya xavflari fonida oltinning xavfsiz investitsiya sifatidagi oʻrniga asoslanib bermoqda.

Citibank(7 fevral holatiga koʻra) oltin narxi qisqa muddatli (0-3 oy) narx prognozini $2,800 dan $3,000 gacha oshirdi, 6-12 oy muddatga boʻlgan prognozini esa oʻzgarishsiz – $3,000 darajasida qoldirdi. Bank, shuningdek, 2025 yil uchun oʻrtacha narx boʻyicha taxminini $2,800 dan $2,900 ga oshirdi.

Macquarie (Avstraliyaning koʻp millatli investitsiya banki va moliyaviy xizmatlari guruhi – tahr.) aniqroq yondashuvni taklif qiladi. 2025 yil boshida AQSh dollari kuchayishi bilan yuzaga keladigan qiyinchiliklarni qayd etgan holda, yil davomida bozordagi ijobiy oʻzgarishlar natijasida oltin narxlarining tiklanishi va oʻsishini kutmoqda.

Jahon oltin kengashi esa ehtiyotkor prognozlar taqdim etmoqda. 2024 yilda oltin narxlari rekord darajaga yetgan boʻlsa-da, 2025 yilda oʻsish surʼati biroz sekinlashishi mumkin. Shunga qaramay, markaziy banklarning barqaror talabi va iqtisodiy beqarorlik uzoq muddatda oltin narxlarining barqarorligini qoʻllab-quvvatlaydi.

Yangilangan prognoz: 2025 yilda oltin narxi yana qanchagacha koʻtarilishi mumkin?

Qaysi asosiy omillar oltin narxlariga taʼsir qiladi?

Geosiyosiy taranglik. Global noaniqliklar, jumladan, davlatlararo davom etayotgan mojarolar, savdo nizolari va diplomatik ziddiyatlar investorlarda oltinga qiziqishni oshirishda davom etmoqda. Tarixdan maʼlumki, urush vaqtida oltinning narxi koʻtariladi. Xavfsiz investitsiya sifatida oltin geosiyosiy beqarorlik davrida ishonchli boylik saqlash vositasi hisoblanadi.
Iqtisodiy siyosat. Inflyatsiya xavflari va iqtisodiy siyosatlardagi oʻzgarishlar, xususan, Tramp maʼmuriyati davrida oltin narxlarining shakllanishida muhim rol oʻynashi mumkin. Markaziy banklarning iqtisodiy muammolarni yengib oʻtish uchun foiz stavkalarini pasaytirishi oltinni inflyatsiyadan himoyalanish vositasi sifatida investorlar uchun yanada jozibador qiladi.
Markaziy bank talabi. 2024 yilda markaziy banklar oltin zaxiralarini rekord darajada oshirdi. Xususan, Oʻzbekiston ham yil davomida muntazam oltin xarid qildi. Ushbu trend 2025 yilda ham davom etishi kutilmoqda va bu oltinning strategik aktiv sifatidagi mavqesini yanada mustahkamlaydi.
Bozorning beqarorligi. Iqtisodiy noaniqlik va aktivlar narxlarining tebranishi bilan bogʻliq bozor beqarorligi oltinning jozibadorligini oshiradi. Investorlar turbulent davrlarda oʻz portfellarini himoya qilish uchun oltinga murojaat qilishadi.

Oʻzbekistonda oltinni qanday sotib olish mumkin?

Oʻzbekistonda Markaziy bank tomonidan 999,9 soflikdagi oltindan 5, 10, 20 va 50 gramm quymalar sotuvga chiqarilgan va quymalar narxini regulyator har kuni yangilab boradi. Oltin quymalarini banklardan sotib olish imkoniyati mavjud. Banklarning manzillari va batafsil maʼlumotlarni Markaziy bank rasmiy saytidan topish mumkin.

Prognoz: 2025 yilda oltin narxi bilan nimalar sodir boʻladi?