Олтин бозори дунё бўйлаб инвесторларда катта қизиқиш уйғотишда давом этмоқда. 2024 йилда олтин бир унция учун тарихдаги рекорд сумма – $2,790 гача чиқди.

Олтин нархи 2025 йилда ҳам юқорилаб, рекордларни янгилашда давом этадими? Молиявий институтлар ва таҳлилчилар бу борада анча яхши прогнозлар беришмоқда.

Нима учун олтин хавфсиз инвестиция ҳисобланади?

Олтин ўзининг ички қиймати, камёблиги ва иқтисодий пасайишлар ва геосиёсий инқирозлар давридаги тарихий кўрсаткичлари туфайли хавфсиз инвестиция деб ҳисобланади. У инфляция ва валюта қадрсизланишига қарши ҳимоя воситаси сифатида хизмат қилади.

Институционал прогнозлар

Goldman Sachs (Американинг трансмиллий инвестиция банки ва молиявий хизматлар компанияси – таҳр.) 2025 йил охирига бориб олтин нархи бир троя унцияси учун $3,000 га етишини прогноз қилмоқда. Ушбу прогноз дунё марказий банкларининг 2024 йилда рекорд даражада ўсган харидлари ва АҚШ иқтисодиётини барқарорлаштиришга қаратилган Федерал Резерв ставкаларини пасайтириш чоралари билан изоҳланади.

Bank of America (депозитларининг миқдори бўйича АҚШдаги энг катта тижорат банкларидан бири – таҳр.) Goldman Sachs’га ҳамоҳанг равишда, олтин нархлари 2025 йилда $3,000 га етишини тахмин қилмоқда. Улар бу прогнозни иқтисодий ноаниқлик ва инфляция хавфлари фонида олтиннинг хавфсиз инвестиция сифатидаги ўрнига асосланиб бермоқда.

Citibank(7 февраль ҳолатига кўра) олтин нархи қисқа муддатли (0-3 ой) нарх прогнозини $2,800 дан $3,000 гача оширди, 6-12 ой муддатга бўлган прогнозини эса ўзгаришсиз – $3,000 даражасида қолдирди. Банк, шунингдек, 2025 йил учун ўртача нарх бўйича тахминини $2,800 дан $2,900 га оширди.

Macquarie (Австралиянинг кўп миллатли инвестиция банки ва молиявий хизматлари гуруҳи – таҳр.) аниқроқ ёндашувни таклиф қилади. 2025 йил бошида АҚШ доллари кучайиши билан юзага келадиган қийинчиликларни қайд этган ҳолда, йил давомида бозордаги ижобий ўзгаришлар натижасида олтин нархларининг тикланиши ва ўсишини кутмоқда.

Жаҳон олтин кенгаши эса эҳтиёткор прогнозлар тақдим этмоқда. 2024 йилда олтин нархлари рекорд даражага етган бўлса-да, 2025 йилда ўсиш суръати бироз секинлашиши мумкин. Шунга қарамай, марказий банкларнинг барқарор талаби ва иқтисодий беқарорлик узоқ муддатда олтин нархларининг барқарорлигини қўллаб-қувватлайди.

Янгиланган прогноз: 2025 йилда олтин нархи яна қанчагача кўтарилиши мумкин?

Қайси асосий омиллар олтин нархларига таъсир қилади?

Геосиёсий таранглик. Глобал ноаниқликлар, жумладан, давлатлараро давом этаётган можаролар, савдо низолари ва дипломатик зиддиятлар инвесторларда олтинга қизиқишни оширишда давом этмоқда. Тарихдан маълумки, уруш вақтида олтиннинг нархи кўтарилади. Хавфсиз инвестиция сифатида олтин геосиёсий беқарорлик даврида ишончли бойлик сақлаш воситаси ҳисобланади.
Иқтисодий сиёсат. Инфляция хавфлари ва иқтисодий сиёсатлардаги ўзгаришлар, хусусан, Трамп маъмурияти даврида олтин нархларининг шаклланишида муҳим роль ўйнаши мумкин. Марказий банкларнинг иқтисодий муаммоларни енгиб ўтиш учун фоиз ставкаларини пасайтириши олтинни инфляциядан ҳимояланиш воситаси сифатида инвесторлар учун янада жозибадор қилади.
Марказий банк талаби. 2024 йилда марказий банклар олтин захираларини рекорд даражада оширди. Хусусан, Ўзбекистон ҳам йил давомида мунтазам олтин харид қилди. Ушбу тренд 2025 йилда ҳам давом этиши кутилмоқда ва бу олтиннинг стратегик актив сифатидаги мавқесини янада мустаҳкамлайди.
Бозорнинг беқарорлиги. Иқтисодий ноаниқлик ва активлар нархларининг тебраниши билан боғлиқ бозор беқарорлиги олтиннинг жозибадорлигини оширади. Инвесторлар турбулент даврларда ўз портфелларини ҳимоя қилиш учун олтинга мурожаат қилишади.

Ўзбекистонда олтинни қандай сотиб олиш мумкин?

Ўзбекистонда Марказий банк томонидан 999,9 софликдаги олтиндан 5, 10, 20 ва 50 грамм қуймалар сотувга чиқарилган ва қуймалар нархини регулятор ҳар куни янгилаб боради. Олтин қуймаларини банклардан сотиб олиш имконияти мавжуд. Банкларнинг манзиллари ва батафсил маълумотларни Марказий банк расмий сайтидан топиш мумкин.

Прогноз: 2025 йилда олтин нархи билан нималар содир бўлади?