Ilon Maskning SpaceXAI kompaniyasi foydalanuvchi oʻrniga kompyuterda mustaqil ishlay oladigan Grok Bot sunʼiy intellekt agentlarini ishga tushirdi.

Ular oʻz virtual kompyuteriga ega boʻlib, ilova va saytlardan foydalanishi hamda foydalanuvchining qurilmasi oʻchiq boʻlsa ham sutka davomida vazifalarni bajarishda davom etishi mumkin.

Kompaniya yangi mahsulotni oddiy AI-assistentdan koʻra “raqamli hamkasb” sifatida taqdim etmoqda. Grok Bot’ga vazifa berilgach, u ishni bosqichlarga ajratishi, kerakli servislarni ochishi va jarayonni mustaqil yakunlashi mumkin.

Har bir Grok Bot uchun alohida doimiy bulutli virtual kompyuter ajratiladi. Unda brauzer, fayl tizimi va terminal mavjud. Shu sababli bot faqat savollarga javob berish bilan cheklanmaydi. U odatda xodim kompyuter orqali bajaradigan amaliy ishlarni ham bajarishi mumkin.

Masalan, agent sayt va ilovalarga kirishi, elektron xatlar bilan ishlashi, maʼlumotlarni yigʻishi, hujjatlar tayyorlashi yoki kod bilan bogʻliq vazifalarni bajarishi mumkin. Jarayon bulutda amalga oshirilgani uchun foydalanuvchining shaxsiy kompyuteri doim yoqilgan boʻlishi shart emas

Grok Bot’ning yana bir farqli jihati — bir nechta agentning birgalikda ishlashi. Botlar oʻzaro aloqa qilib, vazifalarni muvofiqlashtirishi va ish kontekstini saqlab qolishi mumkin. Tizim foydalanuvchidan asosan qoʻshimcha maʼlumot yoki muhim harakat uchun tasdiq zarur boʻlganda murojaat qiladi.

SpaceXAI maʼlumotiga koʻra, Grok Bot avval kompaniya ichida sinovdan oʻtkazilgan. Uning dastlabki versiyalaridan savdo, marketing va operatsion jarayonlarda, shuningdek dasturiy xatolarni tuzatishda foydalanilgan. Keyinchalik loyiha alohida mahsulotga aylantirilgan.

Hozir Grok Bot beta bosqichida ishlamoqda. Undan ayrim SuperGrok Heavy, Cursor Ultra va Cursor Teams Premium foydalanuvchilari foydalanishi mumkin. Kompaniyalar uchun kengroq foydalanish imkoniyati hozircha kutish roʻyxati orqali taqdim etilmoqda.

Ilon Mask 24/7 ishlaydigan “raqamli xodimlar”ni ishga tushirdi