5 fevral kuni “Kafolat sugʻurta kompaniyasi” AJ Kuzatuv kengashining yigʻilishi boʻlib oʻtdi. Unda kompaniya ustav kapitalini 240 mlrd soʻmga oshirish toʻgʻrisida qaror qabul qilindi.

Mazkur qarorga muvofiq, nominal qiymati 1 soʻm boʻlgan 24,5 mlrd dona oddiy aksiya chiqariladi. Ushbu aksiyalar aksiyadorlarga imtiyozli sotib olish huquqini berish orqali yopiq obuna usulida joylashtiriladi.

Agar aksiyadorlar oʻzlarining imtiyozli sotib olish huquqidan foydalanmasa yoki qisman foydalansa, qolgan aksiyalar yopiq obuna orqali Inagamjanova Dilobar Baxtiyarovnaga joylashtiriladi. Bu esa kompaniyaga yangi aksiyador kirib kelishi mumkinligini anglatadi.

Jarayon yakunlangach, kompaniyaning ustav kapitali 455,5 mlrd soʻmga yetadi.

Maʼlumot uchun, 2024 yil aprel oyida “Toshkent” Respublika fond birjasida “Kafolat sugʻurta” aksiyalari delisting qilingan edi.

Hozirda “Kafolat sugʻurta” kompaniyasining yagona aksiyadori Plum Technologies AJ hisoblanadi. Mazkur kompaniya 2017 yilda tashkil etilgan boʻlib, fintex yoʻnalishida, jumladan elektron tijorat va onlayn toʻlovlar sohasida faoliyat yuritadi.

Plum Technologies’ning ustav kapitali 223 mlrd soʻmni tashkil etadi. Kompaniya aksiyalarining 98,8 foizi Akilov Akbar Anvarovichga, qolgan qismi esa Aziz Bakiyevga tegishli.

Bundan tashqari, Akbar Akilov Uzcard toʻlov tizimi Kuzatuv kengashi raisi hisoblanadi.

Akilov, shuningdek, 2024 yildan buyon Uzcard’ni yuritib kelayotgan “USMG” MChJda 25 foizlik ulushga ega. Kompaniyaning qolgan 75 foizi esa “IMC-Capital” MChJ xorijiy kompaniyasiga tegishli. “IMC-Capital” oʻz navbatida boshqa bir xorijiy kompaniya — Berill Holding Company Limeted’ga qarashli boʻlib, uning direktori sifatida Aziz Yusupov (kuzatuv kengashi aʼzosi) koʻrsatilgan.

“Kafolat sugʻurta” ustav kapitaliga yangi aksiyador qoʻshilishi kutilmoqda