Toshkent shahrida 120 ming AQSh dollarini internet tarmoqlaridagi qimor va tavakkalchilikka asoslangan oʻyinlarga tikib, talon-toroj qilgan shaxslar fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti axborot xizmati maʼlum qildi.

Qayd etilishicha, Departamentning Yashnobod tumani boʻlimi tijorat bankining murojaati asosida oʻtkazilgan tergovga qadar tekshiruv jarayonida Yashnobod tumanidagi bank filialida boʻlim boshligʻi vazifasida ishlagan E.N. boshqa masʼul shaxslar bilan oʻzaro til biriktirgani aniqlangan.

U “A.” MChJ masʼullari bilan kelishgan holda “B.B.” MChJ nomiga 120 ming AQSh dollari miqdorida kredit ajratilishiga erishgan. Shundan soʻng soxta hujjatlar rasmiylashtirilib, kredit mablagʻlari naqdlashtirilgan hamda ushbu pullar internet orqali qimor va tavakkalchilikka asoslangan oʻyinlarga sarflanib, talon-toroj qilingan.

Mazkur holat yuzasidan Jinoyat kodeksining 167-moddasi (oʻzlashtirish yoki rastrata yoʻli bilan talon-toroj qilish) va 228-moddasi (hujjatlar, shtamplar, muhrlar va blankalarni tayyorlash, qalbakilashtirish, sotish yoki ulardan foydalanish) bilan jinoyat ishi qoʻzgʻatilib, tergov harakatlari olib borilmoqda.

Avvalroq Fargʻonada hokim yordamchilari tomonidan 40 mlrd soʻmlik kredit mablagʻlari talon-toroj qilingani xabar qilingan edi.

Toshkentda bankir va uning sheriklari 120 ming dollarlik kreditni qimorga tikib yubordi