Google Gemini ilovasiga sunʼiy intellekt asosidagi musiqa yaratish funksiyasini qoʻshdi. Ushbu imkoniyat Google DeepMind’ning eng soʻnggi generativ musiqa modeli — Lyria 3 asosida ishlaydi va hozircha beta rejimida joriy etilmoqda.

Foydalanuvchilaar gʻoyani tasvirlab berish yoki foto/video yuklash orqali 30 soniyalik treklar yaratishi mumkin.

Masalan, “shaxsiy maʼlumotlari darknetda tarqab ketgan, “xavfsizlik qayerda?” degan savoliga “kerak boʻlsa sotib olib isbotla” degan kinoyali javobni olgan shaxs haqida pop uslubidagi, ijtimoiy tanqid ruhidagi qoʻshiq” kabi prompt qisqa vaqt ichida toʻliq kompozitsiyaga aylanadi.

Treklarni quyidagi havolalar orqali eshitish mumkin:

Gemini yuklangan kontentdan kengroq ijodiy ilhom ham olishi, soʻrovga qarab matn yoki instrumental musiqa yaratishi mumkin.

Lyria 3 imkoniyatlari va yaratish rejimlari

Lyria 3 oldingi versiyalarga nisbatan uchta asosiy yangilikni taqdim etadi:

Prompt asosida avtomatik qoʻshiq matni (lyrics) yaratish
Janr, kayfiyat, tempo va vokal uslubi ustidan kengroq nazorat
Yanada realistik va musiqiy jihatdan murakkab natija

Musiqani bir nechta usulda yaratish mumkin:

Text to track (Matndan trekka): Bunda foydalanuvchi janr, kayfiyat, xotira yoki ichki hazilni tasvirlab berishi kerak. Shundan soʻng Gemini ijod qilgan holda trekni yaratadi.

Foto yoki video asosida trek: Tasvir yoki videoni yuklab, mavzuga mos musiqa va matn yaratishni soʻrash mumkin. Bu koʻchada, uyda va boshqa yerda tushirilgan surʼatlar ham boʻlishi mumkin

Har bir trek Nano Banana tomonidan yaratilgan maxsus muqova rasmi bilan taqdim etiladi hamda uni yuklab olish yoki toʻgʻridan-toʻgʻri havola orqali ulashish mumkin.

Ayni paytda funksiyaning beta bosqichda ekanini inobatga olib, siyosiy, diniy yoki boshqa nozik mavzularda musiqa yaratishda ayrim cheklovlar qoʻllanilishi mumkin.

Shuningdek, Gemini oʻzbek tilida ham tabiiy talaffuz va sezilarli aksentsiz musiqa yaratishi eʼtiborga loyiq jihatlardan biridir.

Gemini’da sunʼiy intellekt orqali musiqa yaratish funksiyasi paydo boʻldi