Markaziy bank maʼlumotlariga koʻra, 1 apreldan 7 maygacha boʻlgan davrda eskrou hisobvaraqlari orqali koʻchmas mulk va transport vositalari oldi-sotdisi boʻyicha bitimlar sezilarli darajada faollashgan.

Hisobot davrida jami 40 767 ta bitim rasmiylashtirilgan. Shundan 23 804 tasi transport vositalari, 16 963 tasi esa koʻchmas mulk oldi-sotdisiga toʻgʻri keladi.

Hududlar kesimida eng yuqori faollik Toshkent shahrida qayd etilgan — poytaxtda ushbu davrda 11 679 ta bitim amalga oshirilgan. Keyingi oʻrinlardan Fargʻona viloyati — 3940 ta, Samarqand viloyati — 3614 ta bitim bilan joy olgan.

Kuchli beshlikni Andijon viloyati — 3128 ta hamda Namangan viloyati — 2856 ta bitim bilan yakunlagan.

Regulyatorning taʼkidlashicha, eskrou mexanizmining joriy etilishi oldi-sotdi jarayonlarida hisob-kitoblar xavfsizligi, shaffofligi va ishonchliligini oshirishga xizmat qiladi. Bunda xaridor ham, sotuvchi ham bitim yakuniga qadar moliyaviy xavflardan nisbatan yaxshiroq himoyalanadi.

2026 yil 1 apreldan boshlab Oʻzbekistonda koʻchmas mulk hamda ishlab chiqarilganiga 10 yildan oshmagan avtomobillar oldi-sotdisi boʻyicha hisob-kitoblarning yangi tartibi joriy etildi.

Yangi tartibga koʻra, bunday bitimlar bank orqali, eskrou hisobvaragʻidan foydalangan holda amalga oshiriladi. Yaʼni xaridor mablagʻni sotuvchiga bevosita oʻtkazmaydi — pul avval bankdagi maxsus hisobvaraqda saqlanadi. Bitim toʻliq yakunlanib, mulk huquqi rasmiylashtirilgach, bank ushbu mablagʻni sotuvchiga oʻtkazib beradi.

Bir oyda eskrou orqali 40 mingdan ortiq oldi-sotdi bitimi rasmiylashtirildi