Jahonning eng nufuzli axborot agentliklaridan biri — Reuters AQSh hukumati Markaziy Osiyodagi muhim foydali qazilmalar boʻyicha kengroq va barqaror kirish imkonini taʼminlash maqsadida Oʻzbekiston bilan kelishuv imzolagani haqida yozdi.

Bu qadam AQSh prezidenti Donald Tramp Xitoyning strategik resurslar va ularning taʼminot zanjirlaridagi ustunligiga qarshi choralar koʻrayotgan bir paytda amalga oshirildi, deyiladi nashr xabarida.

AQShning Xalqaro taraqqiyot moliya korporatsiyasi (DFC) va Markaziy Osiyoning eng koʻp aholiga ega davlati oʻrtasida tuzilgan “Qoʻshma investitsiya doirasi” ikki mamlakat oʻrtasidagi strategik hamkorlikni rivojlantirishga qaratilgan. DFC bayonotiga koʻra, ushbu tashabbus ikki mamlakat oʻrtasidagi strategik hamkorlikni yangi bosqichga olib chiqishni maqsad qilgan.

Rejaga koʻra, investitsiyalar muhim foydali qazilmalar qiymat zanjirining barcha bosqichlarini, jumladan geologik qidiruv, qazib olish va qayta ishlashni qamrab oladi. Shuningdek, kelgusidagi mineral va infratuzilma loyihalari uchun AQSh–Oʻzbekiston Qoʻshma investitsiya xolding kompaniyasini tashkil etish taklif qilinmoqda.

Donald Tramp hokimiyatga qaytgach, AQSh Markaziy Osiyodagi sobiq Sovet respublikalarining beshtasi bilan aloqalarni kuchaytirishga kirishdi va anʼanaviy ravishda Rossiya hamda Xitoy taʼsiri ustun boʻlgan mintaqada oʻz pozitsiyasini mustahkamlashga harakat qilmoqda.

Tramp noyabr oyida Oq uyda Oʻzbekiston prezidenti Shavkat Mirziyoyevni, shuningdek Qozogʻiston, Qirgʻiziston, Tojikiston va Turkmaniston yetakchilarini qabul qilgan edi. Shu oy boshida esa u muhim foydali qazilmalar boʻyicha sammit oʻtkazib, 11 ta davlat, jumladan Oʻzbekiston bilan muhim minerallar taʼminoti yuzasidan dastlabki Anglashuv memorandumlarini imzolashga erishdi.

Markaziy Osiyodagi ikkinchi yirik iqtisodiyot hisoblangan Oʻzbekiston 2016 yildan buyon keng koʻlamli iqtisodiy islohotlarni amalga oshirib kelmoqda. Soʻnggi yillarda mamlakat investitsion muhitni yaxshilash, sanoatni modernizatsiya qilish va tashqi iqtisodiy aloqalarni kengaytirishga alohida eʼtibor qaratdi.

Qariyb 40 million aholiga ega Oʻzbekiston oltin, uran va misning yirik zaxiralariga ega. Bundan tashqari, zamonaviy texnologiyalar va “yashil energetika” uchun muhim ahamiyatga ega boʻlgan litiy, volfram hamda boshqa qator strategik minerallarning hali toʻliq oʻzlashtirilmagan salmoqli konlari mavjud.

Oʻzbekiston bilan imzolangan kelishuv Tramp strategiyasida DFC’ning roli ortib borayotganini ham koʻrsatadi. U oʻtgan yili tuzilgan Ukraina bilan mineral kelishuvda muhim rol oʻynagan va hozirda resurslarga boy bir qator Afrika davlatlarida loyihalarni boshqarib bormoqda.

DFC bayonotiga koʻra, Oʻzbekiston bilan tuzilgan kelishuv “umumiy iqtisodiy manfaatlarni ilgari surish, shuningdek muhim foydali qazilmalar, infratuzilma va energetika kabi strategik sohalarda qoʻshma investitsiyalarni ragʻbatlantirishga” xizmat qiladi.

AQSh Oʻzbekiston bilan muhim foydali qazilmalar boʻyicha strategik kelishuv imzoladi — Reuters

Oʻzbekiston pasportining jahon reytingidagi oʻrni yuqoriladi