Yevropa Ittifoqining Rossiyaga qarshi yangi sanksiyalar roʻyxatiga Oʻzbekiston kompaniyalari ham kiritilishi mumkin — FT
Yevropa Ittifoqi Rossiyaga qarshi 17-sanksiyalar paketini tayyorlamoqda.
Yangi cheklovlar roʻyxatiga Oʻzbekiston, Turkiya va yana bir necha davlatdagi kompaniyalar ham kiritilishi mumkin.
Financial Times’ning yozishicha, Bryussel ushbu kompaniyalarni Kremlga sanksiyalarni chetlab oʻtishda vositachilik qilganlikda gumon qilmoqda.
Yevropa Ittifoqi Ukrainaga qarshi urush boshlanganidan beri Rossiyaga qarshi 17-sanksiyalar paketini tayyorlamoqda. Yangi paket Rossiyaga sanksiyalarni chetlab oʻtishga yordam berishi taxmin qilinayotgan 20 dan ortiq yangi kompaniyalarga qaratilgan.
Taklif etilayotgan choralarga koʻra, Oʻzbekiston, Turkiya, Serbiya, Vetnam va Birlashgan Arab Amirliklarida faoliyat yuritayotgan kompaniyalar sanksiyalar roʻyxatiga kiritilishi mumkin. Bu haqda Financial Times xabar berdi.
Ushbu paket, shuningdek, Rossiyaning "soya flotiga" mansub 149 ta neft tankerini va Rossiya hamda Xitoydagi 60 ga yaqin shaxs va tashkilotni nishonga oladi. Maqsad – Rossiyaga bosimni saqlab qolish va sanksiyalarni chetlab oʻtish yoʻllarini yopishdir.
Shuningdek, ushbu paket Rossiyaga eksporti taqiqlangan mahsulotlar roʻyxatiga harbiy maqsadlarda ishlatilishi mumkin boʻlgan baʼzi ikki yoʻnalishli tovarlarni, masalan, kimyoviy moddalar va stanok komponentlarini qoʻshishni nazarda tutadi.
