Европа Иттифоқининг Россияга қарши янги санкциялар рўйхатига Ўзбекистон компаниялари ҳам киритилиши мумкин — FT
Европа Иттифоқи Россияга қарши 17-санкциялар пакетини тайёрламоқда.
Янги чекловлар рўйхатига Ўзбекистон, Туркия ва яна бир неча давлатдаги компаниялар ҳам киритилиши мумкин.
Financial Times’нинг ёзишича, Брюссел ушбу компанияларни Кремлга санкцияларни четлаб ўтишда воситачилик қилганликда гумон қилмоқда.
Европа Иттифоқи Украинага қарши уруш бошланганидан бери Россияга қарши 17-санкциялар пакетини тайёрламоқда. Янги пакет Россияга санкцияларни четлаб ўтишга ёрдам бериши тахмин қилинаётган 20 дан ортиқ янги компанияларга қаратилган.
Таклиф этилаётган чораларга кўра, Ўзбекистон, Туркия, Сербия, Ветнам ва Бирлашган Араб Амирликларида фаолият юритаётган компаниялар санкциялар рўйхатига киритилиши мумкин. Бу ҳақда Financial Times хабар берди.
Ушбу пакет, шунингдек, Россиянинг "соя флотига" мансуб 149 та нефть танкерини ва Россия ҳамда Хитойдаги 60 га яқин шахс ва ташкилотни нишонга олади. Мақсад – Россияга босимни сақлаб қолиш ва санкцияларни четлаб ўтиш йўлларини ёпишдир.
Шунингдек, ушбу пакет Россияга экспорти тақиқланган маҳсулотлар рўйхатига ҳарбий мақсадларда ишлатилиши мумкин бўлган баъзи икки йўналишли товарларни, масалан, кимёвий моддалар ва станок компонентларини қўшишни назарда тутади.
