Wolt yetkazib berish xizmati Oʻzbekistondagi faoliyatini toʻxtatadi
Kompaniya 2026 yil 5 martdan boshlab ilova va rasmiy sayt orqali buyurtmalarni qabul qilishni toʻliq toʻxtatishini maʼlum qildi. Qaror bozor sharoitlari va barqaror biznes yuritish bilan bogʻliq qiyinchiliklar bilan izohlangan.
Wolt yetkazib berish xizmati Oʻzbekistondagi faoliyatini toʻxtatadi. Bu haqda kompaniya oʻzining mobil ilovasi va rasmiy saytida maʼlum qildi.
Kompaniya bayonotida qayd etilishicha, 2026 yil 5 martdan boshlab ilova yoki sayt orqali buyurtma berish imkoni boʻlmaydi.
“Biz Oʻzbekistonda xizmatimiz faoliyatini toʻliq toʻxtatish haqida qaror qabul qildik. Bu xabar siz uchun noxush yoki noqulay boʻlishi mumkinligini tushunamiz. Kundalik hayotingizning bir qismi boʻlish biz uchun muhim edi va Wolt’ni tanlaganingiz uchun sizdan minnatdormiz”, — deyiladi xabarda.
Maʼlum qilinishicha, 2026 yil 4 martga qadar servis odatdagi tartibda ishlaydi. Foydalanuvchilar ilova va sayt orqali buyurtma berishda davom etishi mumkin. 5 martdan boshlab esa yangi buyurtmalarni qabul qilish toʻliq toʻxtatiladi.
Shu bilan birga, faoliyat yopilgandan keyin ham mijozlarni qoʻllab-quvvatlash xizmati ishlashda davom etadi. U qaytarimlar, bonus va kreditlar, shuningdek avval rasmiylashtirilgan yetkazib berishlar boʻyicha masalalarni hal qiladi.
Kompaniya qarorining asosiy sababi sifatida bozor sharoitlari barqaror rivojlanish standartlariga mos kelmayotgani koʻrsatilgan. Biznes-model qator operatsion va iqtisodiy qiyinchiliklarga duch kelgan.
Xususan, kompaniya investitsiya siyosatini qayta koʻrib chiqib, uzoq muddatli barqaror oʻsish salohiyati yuqori boʻlgan bozorlarga eʼtibor qaratishga qaror qilgan.
