“Uzbekistan Airways” AJ sof foydasi 11,8 mlrd soʻmga kamaydi
Kompaniyaning birinchi chorakdagi sof foydasi 49,6 mlrd soʻmni tashkil etdi — bu oʻtgan yilga nisbatan 11,8 mlrd soʻmga (23,9%) kamroqdir.
Shuningdek, UzAirways’ning xizmatlardan tushgan yalpi foydasi 171,2 mlrd soʻm boʻlib, oʻtgan yilning shu davriga qaraganda 105,3 mlrd soʻmga (38%) kamaygan.
“Uzbekistan Airways” AJ birinchi chorak yakunlariga oid moliyaviy hisobotini eʼlon qildi. Hisobotga koʻra, kompaniya sof foydasi oʻtgan yilning shu davriga nisbatan 11,8 milliard soʻm yoki 23,9 foizga kamayib, 49,6 milliard soʻmni tashkil etdi.
Shuningdek, kompaniya balansidagi jami aktivlar davr boshiga nisbatan 776 milliard soʻmga oshib, 18,7 trillion soʻmga yetdi. Shu bilan birga, kompaniyaning umumiy majburiyatlari ham 855 milliard soʻmga koʻpayib, 10,9 trillion soʻmni tashkil qildi.
Kompaniyaning xizmat koʻrsatishdan olgan yalpi foydasi 171,2 milliard soʻmni tashkil etdi. Bu koʻrsatkich oʻtgan yilning mos davri bilan solishtirilganda 38 foizga yoki 105,3 milliard soʻmga kamaygan.
Hisobot davrida “Uzbekistan Airways” AJ tomonidan 10,3 milliard soʻm miqdorida daromad soligʻi toʻlangan boʻlib, bu oʻtgan yilga nisbatan 15,1 foizga kamdir.
Barcha xarajatlar hisobga olingach, kompaniya chorakni 49,6 milliard soʻm miqdoridagi sof foyda bilan yakunlagan.
