UzAuto Motors sof foydasi birinchi chorakda ikki barobardan koʻproqqa kamaydi
2025 yilning yanvar–mart oylarida kompaniya 637,5 milliard soʻm sof foyda koʻrgan. Sof foydadagi yillik pasayish 50 foizni tashkil etib, bu ikki baravardan koʻproq kamayishni anglatadi.
UzAuto Motors AJ 2025 yilning yanvar–mart oylarini oʻz ichiga olgan birinchi chorak boʻyicha moliyaviy hisobotini eʼlon qildi. Hisobotda keltirilishicha, kompaniya mazkur davrda 637,5 milliard soʻm sof foyda koʻrgan.
Bu koʻrsatkich oʻtgan yilning xuddi shu davriga nisbatan sezilarli darajada kam – 2024 yilning birinchi choragida kompaniya qariyb 1,3 trillion soʻm sof foyda qayd etgan.
Solishtirma tahlilga koʻra, sof foydadagi yillik pasayish 50,7 foizni tashkil etib, bu ikki baravardan koʻproq kamayishni anglatadi.
Bundan tashqari, kompaniyaning umumiy tushumi ham qisqargan. 2025 yilning birinchi choragida tushum 9,7 trillion soʻmni tashkil etib, oʻtgan yilga nisbatan 17 foizga kamaygan. Tannarx ham 12,5 foizga qisqargan boʻlsa-da, bu rentabellik darajasining tushishini toʻxtata olmagan. Natijada, kompaniyaning rentabellik darajasi 20,4 foizdan 16 foizgacha pasaygan.
Shu bilan birga, kompaniyaning xarajatlari deyarli oʻzgarmagan va 1 trillion soʻm atrofida saqlanib qolgan.
Eslatib oʻtamiz, 2024 yilning uchinchi choragida UzAuto Motors rekord darajadagi moliyaviy natijalarni qayd etgan edi. Kompaniya oʻsha davrda qariyb 2,8 trillion soʻm (taxminan 213 million dollar) miqdorida sof foyda koʻrgani maʼlum qilingan.
