Uorren Baffet tavsiya qilgan 5 ta kitob
Dunyoning eng muvaffaqiyatli investorlaridan biri hisoblangan Uorren Baffet oʻz muvaffaqiyatlarini doimiy oʻrganish va kitob oʻqishga bogʻlaydi. Pinkod.uz Baffet tavsiya qilgan kitoblarni jamladi.
Uorren Baffet — dunyoning eng mashhur investorlaridan biri. U oʻz muvaffaqiyatlarini doimiy oʻrganish va kitob oʻqishga bogʻlaydi. Quyida aynan u tomonidan tavsiya qilingan beshta kitobga toʻxtalib oʻtamiz.
“Aqlli investor” (“The Intelligent Investor”) – Benjamin Grem
Bu kitob investitsiya haqida yozilgan eng muhim asarlardan biri hisoblanadi. Unda Benjamin Grem uzoq muddatli investitsiya strategiyalari va riskni boshqarish tamoyillarini oʻrgatadi. Kitob asosan investitsiya qilishda xatolardan qochish va aksiyalar qiymatini toʻgʻri baholashga eʼtibor qaratadi.
“Biznes carguzashtlari” (“Business Adventures”) – Jon Bruks
Kitobda yirik kompaniyalarning tarixiy voqealari va qiyin qarorlar qabul qilishdagi tajribalar batafsil tahlil qilingan. Uorren Baffet bu kitobni biznes strategiyalari va insoniy xatolardan saboq olish uchun muhim deb hisoblaydi. Kitob Bill Geyts tomonidan ham yuqori baholangan.
“Oddiy aksiyalar va noyob foyda” (“Common Stocks and Uncommon Profits”) – Filip Fisher
Bu kitob kompaniyalarni tahlil qilishning oʻziga xos usullarini oʻrgatadi. Fisher kitobida kompaniyalarning uzoq muddatli oʻsish imkoniyatlarini baholash va sifatli menejmentni tanlash boʻyicha qimmatli tavsiyalar berib oʻtgan.
“Poor Charlie’s Almanack” – Charlz Manger
Baffetning doimiy hamkori boʻlgan Charlz Mangerning qarashlari, qaror qabul qilish jarayonlari va falsafasi bu kitobda jamlangan. Bu asar nafaqat sarmoya, balki hayotiy qarorlar qabul qilishga oid koʻplab darslarni ham oʻz ichiga oladi.
“Eng muhim narsa” (“The Most Important Thing”) – Xovard Marks
Kitob investitsiya xatarlarini boshqarish va bozorlardagi ehtimoliy imkoniyatlarni koʻra olish haqidagi tushunchalarni oshirishga yordam beradi. Marksning falsafasi Baffet tomonidan yuqori baholangan va bu kitob investorlar uchun qimmatli qoʻllanma hisoblanadi.
Uorren Baffetning fikricha, oʻqish va oʻrganish orqali moliyaviy savodxonlikni oshirish muvaffaqiyatning kalitidir. Ushbu kitoblar esa sizga investitsiya, menejment va uzoq muddatli muvaffaqiyat haqida chuqur tushuncha beradi.
