Tesla’ning Yevropadagi savdolari fevral oyida 40 foizga tushib ketdi
Bunga asosiy sabab sifatida Ilon Maskning siyosiy jarayonlardagi ishtiroki va brend imijining pasayishi koʻrsatilmoqda.
Tesla soʻnggi oylarda Yevropada katta muammolarga duch kelmoqda. Bloomberg bergan maʼlumotga koʻra, Ilon Mask boshchiligidagi kompaniya 2025 yil fevral oyida atigi 16 888 ta yangi avtomobil sotdi, bu esa oʻtgan yilning shu davriga nisbatan 40% ga kam demakdir. Tesla’ning savdosi yilning dastlabki ikki oyida 43% ga pasaygan boʻlsa, butun elektromobil sanoati boʻyicha roʻyxatdan oʻtkazish koʻrsatkichlari 31% ga oshdi.
Tesla hozirda oʻzining eng mashhur modeli boʻlgan Model Y’ning yangilangan versiyasini chiqarish orqali bozor ulushini tiklashga harakat qilmoqda. Mart oyining boshida yetkazib berish boshlangan boʻlsa-da, kompaniya hali ham katta qiyinchiliklarga duch kelmoqda. Teslaʼning savdo pasayishi faqat ishlab chiqarish uzilishlari bilan emas, balki Ilon Maskning siyosiy faolligi bilan ham bogʻliq boʻlishi mumkin.
Trampning AQSh prezidentligiga qaytishi ortidan Mask uning asosiy maslahatchilaridan biriga aylandi. Bu esa Tesla’ning brend imidjiga salbiy taʼsir koʻrsatmoqda. Maskning tanqidchilari AQSh va xorijda Tesla doʻkonlari, quvvatlash stansiyalari va mijozlarining avtomobillariga hujum qilishmoqda. Ayniqsa, Mask Germaniya federal saylovlariga aralashmoqchi boʻlgach, uning ommaviy reytingi keskin tushib ketdi. Bundan tashqari, u AQShning NATOdan chiqishi va Yevropaning mudofaasi uchun toʻlovlarni toʻxtatish taklifini ilgari surdi, bu esa Yevropadagi mijozlar orasida norozilik uygʻotdi.
Tesla yangi Model Y’ni bozorga chiqarish uchun butun dunyo boʻylab zavodlarida ishlab chiqarishni vaqtincha toʻxtatishga majbur boʻldi. Jumladan, kompaniyaning Berlin yaqinidagi montaj fabrikasida ham ishlab chiqarish qisqa muddatga toʻxtatildi. Bu esa kompaniyaga haftalab ishlab chiqarish quvvatini boy berish va savdolarni kechiktirish kabi oqibatlarni keltirib chiqardi.
Tesla uchun mart oyidan keyingi savdo natijalari katta ahamiyatga ega boʻladi. Bu kompaniyaning siyosiy voqealardan qanday taʼsir koʻrayotganini va yangi Model Y savdolarni qanchalik tiklashini aniqlashga yordam beradi.
